Vesair il tramunt dal sulegl entamez la natira cun l'atgna tenda, u durmir sut tschel avert cun in hamac stendì tranter duas plantas. Adina dapli persunas scuvran il trend dal camping selvadi. Quai constatescha il chantun Glaruna. Tant plaschair ch'ins haja che las persunas scuvrian la natira, dettia dentant era sfidas – ha il president communal da Glaruna Sid Hans Rudolf Forrer manegià envers radio SRF.
Las persunas vegnan da tut il mund e parcan ils autos era en la prada perquai ch'ils parcadis èn per il pli gia occupads – e van siadora cun equipament betg adattà per durmir ed ir en las muntognas.
Las consequenzas senta era ina chamona dal Club alpin svizzer en vischinanza. Dis da bell’aura hai enfin 30 tendas enturn la Muttseehütte, che sa chatta tar il Muttenchopf. Ina muntogna sin 2'500 meters sur mar, cun ina vista che persvada. Turistas e turists laschan enavos rument ed excrements dapertut. Quai disturba la guardiachamona Claudia Freitag. Ella emprova da far attent las persunas, dentant saja quai stentus sch'ins stoppia far quai di per di.
La vischnanca Glaruna Sid vul uss agir. En lieus fitg dumandads duai dar ina sort basecamp, che porscha ina infrastructura minimala e che ha reglas. Cun scumonds na vul ins numnadamain betg lavurar.