Il cusseglier guvernativ Marcus Caduff è s'inscuntrà cun ina gruppa da giuvenils sin la Plazza da Teater amez Cuira ed ha trics impressiunants sin il velo da BMX.
Ils giuvenils èn evidentamain stads surstads da ses talent. Chapibel, igl è l'emprima giada ch'ins vesa far il cusseglier guvernativ da quels trics. El e ses team han lavurà cun in stuntdouble – insatgi che fa quels trics per Marcus Caduff.
Far attent ed integrar giuvenils en la discussiun
La finamira da quest'acziun saja da far attent sin ina lescha che duai lubir al chantun da sustegnair finanzialmain projects da giuvenils. Ina tala lescha che lubescha al chantun da sustegnair projects da giuvenils na datti oz anc betg. Quella vegnia elavurada ils proxims mais.
Uschia duai ensemen cun giuvenils interessads vegnir creà la basa per ch'il chantun po dar quest sustegn finanzial per projects ch'èn en favur da giuvenils. In tal dialog tranter Marcus Caduff e giuvnas e giuvens per l'avegnir da la giuventetgna ha lieu mez matg a Glion.
Uschia na vuless il cusseglier guvernativ betg mo vegnir en contact cun ils giuvenils sin la Plazza dal Teater, mabain er cun tut ils auters giuvenils en il Grischun ch'han interess da s'engaschar per questa nova lescha.
