Ensemen cun la scola auta spezialisada da Berna e la associaziun centrala dal parlament da giuventetgna svizra ha la FHGR analisà las respostas dad 865 giuvenils en la vegliadetgna da 10 fin 17 onns. Ina gronda part da las persunas interrogadas eran scolaras e scolars dal stgalim superiur e dal gimnasi dals chantuns Appenzell dador/dadens, Grischun, Son Gagl, Glaruna e Schaffusa. Da las persunas interrogadas èn 49% femininas e 48% umens, 3% han tschernì tar il Sex l'opziun «autra».
Rinforzar la participaziun
Ils resultats conferman che la furmaziun dals geniturs ha in'influenza sin l'interess politic dals uffants. En famiglias betg scoladas vegni discurrì cun ils uffants savens main davart la politica. Betg mo ils geniturs, er las politicras ed ils politichers giogan ina rolla essenziala co ch'ils uffants e giuvenils adempleschan la vita politica. Tenor il studi na sa sentan ils giuvenils plitost betg prendids serius da la politica.
Sch'ina societad vul umans giuvens che s'interesseschan per temas politics, lura èsi er da dar ad els la tschertezza ch'els e lur basegns vegnian prendids serius.
Ultra da quai mussa la retschertga ch'i dat in interess per games per la furmaziun politica, surtut tar la gruppa en mira pli giuvna. Quai pudess vegnir nizzegià sco schanza per sa basar gia baud sin ina via ludica a temas politics. Ultra da quai sa mussa che uffants e giuvenils cun naziunalitad estra u cun naziunalitad dubla han in interess pli grond per temas politics globals sco er per games.
Quest interess pudess esser impurtant per lur sentiment d'appartegnientscha a la societad svizra e pia era per rinforzar lur participaziun politica.
En in proxim pass sviluppa la FHGR uss – en collavuraziun cun la scola auta spezialisada dad Yverdon – in uschenumnà «Serious Game» per promover las cumpetenzas politicas dals uffants da scola. Il prototip duai esser sviluppà fin la fin da l'onn 2025.
