Sper la staziun a Samedan dueva ussa ensasez star in nov bajetg u in stgav. La banca Raiffeisen Engiadina Val Müstair – ch'è dapi il 2022 la possessura da l'edifizi – vuleva numnadamain gia spazzar l'hotel duas giadas. La finamira era tenor la banca, da mantegnair la dimensiun e la fassada da l'hotel Terminus per il nov edifizi – enstagl d'in hotel devi dentant dar ina nova filiala da banca cun ina purschida gastronomica ed abitaziuns per indigens sin quest terren.
L'emprima giada eri planisà da spazzar l'atun dal 2023. Lez onn aveva la banca lura dentant communitgà che las lavurs da spazzar vegnian spustadas per in onn sin l'atun 2024. Sch'ins va sper la staziun da Samedan vi, ves'ins dentant ch'il restaurant al plaunterren da l'hotel ha anc adina avert e ch'osps entran vinavant l'hotel cun valischas. Era sin la pagina d'internet pon ins leger: «Nus avain puspè avert». Tge è uss pia propi la situaziun cun l'hotel Terminus?
Domenico Zaia dastga star
«Ensasez fiss tut stà a fin ils 30 da settember 2024, cura ch'il contract da locaziun cun la banca è scadì. Quest ultim di avain nus era prendì cumià da nossa clientella», declera il mainafatschenta e locatur da l'hotel Terminus, Domenico Zaia. Il Sicilian – che viva gia dapi plirs onns en l'Engiadina e maina gia l'hotel Terminus var in decenni – haja gia fatg urden, pachetà sia valischa e dà adia al Terminus, conceda el.
Circa dus mais pli tard, il november, haja Domenico Zaia dentant survegnì in telefon da la banca Raiffeisen Engiadina Val Müstair. Lezza haja vulì s'entupar cun il Sicilian a Samedan per in discurs. Lura la buna nova: L'hotel Terminus na vegnia per il mument betg spazzà e Domenico Zaia possia restar.
Ina gronda surpraisa
Uschia ha il gastronom sicilian danovamain avert las portas dal Terminus ils 8 da dezember 2024. «Quai è stà ina gronda surpraisa per tuts ed jau m'hai legrà fitg – era sch'igl è stà ina sfida da chattar persunal a curta vista», di Domenico Zaia. El declera vinavant, che la banca Raiffeisen Engiadina Val Müstair haja prolungà il contract da locaziun per dus ulteriurs onns. I dettia forsa schizunt la pussaivladad da restar anc pli ditg, ma quai na saja anc betg sclerì definitivamain cun la possessura da l'hotel.
In project cun maun e pe
La banca Raiffeisen Engiadina Val Müstair ha confirmà envers FMR, ch'il contract da locaziun saja vegnì prolungà per dus ulteriurs onns fin la fin 2026. «Nus n'essan anc betg pli lunsch cun il project, mabain anc adina en la fasa da planisaziun. Perquai avain nus stuì spustar anc ina giada il termin per spazzar», declera Thomas Malgiaritta, parsura da la direcziun da la banca Raiffeisen Engiadina Val Müstair. El aschunta ch'i dettia anc da sclerir pliras dumondas per propi pudair concepir in «project cun maun e pe».
Il nov project è anc adina pir en la fasa da planisaziun.
Perquai haja la banca decidì da prolungar il contract cun il gastronom Domenico Zaia. Dapli na vuleva la banca betg tradir en chaussa. I vegnian puspè ad infurmar sch'i dettia novs detagls davart il futur da l'hotel Terminus.