Puntraschigna – in da numerus lieus turistics tradiziunals en il Grischun. La vischnanca engiadinaisa dumbra radund 30 hotels. Ils ins èn vegls cun in'istorgia da 150 onns u dapli, dasperas datti novs e moderns ed in albiert da giuventetgna. E cun quai betg avunda, l'onn e mez passà èn anc dus hotels vegnids vitiers. Pertge che l'hotellaria da Puntraschigna flurescha talmain, declera la cun-directura da l'Hotel Sunstar, Eva Leitner cun il fatg ch'i vivia a Puntraschigna. I dettia ina bun'interacziun tranter la vischnanca, il turissem, ils giasts ed ils indigens. Tuts sajan stediamain en stretg contact senza barrieras. Quai fetschia ora Puntraschigna. Quai saja quai ch'ella sentia dapi ch'ella saja a Puntraschigna.
Premissas optimalas
E questas premissas optimalas per novs projects veglia la vischnanca era porscher, sco quai che la presidenta communala da Puntraschigna, Nora Saratz Cazin di. Era ella deriva d'ina famiglia da hoteliers.
Nus avain fitg ferm il credo che sch'i dat ina dumonda or da la populaziun u d'utrò da l'emprim ina giada dir: Gea, quai empruvain nus.
Puntraschigna saja avert e na tschertgia betg gia avant che cumenzar arguments pertge ch'in project vegnia ad ir da la glatscha giu. Els emprovian adina da chattar schliaziuns e sch'i na funcziunia alura propi betg lura na funcziunia apunta betg.
Ina tenuta in zic autra pia ch'èn blers auters lieus. Ed in zic auter ch'èn auters lieus funcziuna era l'organisaziun da turissem a Puntraschigna.
Nagin'organisaziun da marketing – quai è decisiv
Per il success da la hotellaria da Puntraschigna datti diversas raschuns. Ina d'ellas è l'organisaziun da turissem e sia vista pli cumplessiva.
La gronda differenza è che nus n'ans vesain betg sco organisaziun da marketing. Quai è fitg decisiv.
Il meglier marketing saja numnadamain d'investir en il product, en l'infrastructura ed en il persunal, uschia Ursin Maissen, il directur da l'organisaziun da turissem da Puntraschigna. Ed auter che auters lieus en l'Engiadin'Ota saja Puntraschigna era ina ferma destinaziun da vacanzas da stad. Cun 60% da las frequenzas da giasts è la stad numnadamain la pli impurtanta stagiun da Puntraschigna. Era quai augmentia l'interess d'investiders e hoteliers da laschar avert ils hotels era sur la stagiun ora, sco per exempel il november. Actualmain hajan tants hotels avert avant il cumenzament da la stagiun d'enviern sco anc mai. La via na saja bain betg simpla, ma en questa direcziun stoppian els ir, di Maissen plinavant.
Nus na dastgain betg spetgar fin ch'il giast vegn.
Da metter ils mauns en giaglioffa e spetgar saja la faussa via. Els stoppian avair il curaschi d'offrir ina spierta era en temps pli ruassaivels sco il november. In unic recept per il success dals hotels da Puntraschigna na datti pia betg. Tge che sa mussa però è che curaschi e passiun sa pajan.