«Scuol Palace – Cura & Cultura» – cun quest label han quatter indigens a partir da la fin dal 2023 dà nova vita a l'edifizi da l'onn 1864. Avant n'aveva l'hotel – cun paucas excepziuns – durant trais onns betg beneventà pli giasts. Singulas occurrenza culturalas sco il «Musical a Scuol» han gì success e lura manà ad ina «gestiun da prova» cun ils quatter indigens giuvens sco fittaders – quella ha per entant cuzza in onn. D'ina vart deva il chasament puspè servir sco hotel, ma da l’autra er esser in lieu per cultura, sanadad e per s'inscunter. «Cura & Cultura» han ils fundaturs numnà lur concept.
L’idea: Giudair e guarir
Concerts, prelecziuns, radunanzas generalas, sairadas cun bal sco eir occurrenzas cul tema sanadad han gì lieu. Na be in Engiadina Bassa, eir sur la regiun ora ha il nov lieu vegl sveglià attenziun. Schizunt il «Kulturplatz» dad SRF ha rapportà da l’idea ambiziusa en connex cun il project Scuol Classics. Bler era gia planisà per l’on 2025. Ma a la fin dal 2024 è vegnida la fin per la giuvna squadra: Il contract da fittanza n’è betg pli vegnì prolungà. Entant è l’inscripziun correspundenta en il register da commerzi vegnida stizzada.
Professiunalisar la gestiun da l’hotel
Il management è uss puspè chaussa da la societad dal proprietari, la Palace Hotel LLC cun sez a Delaware (USA). La Posta Ladina ha dumandà al management ina posiziun davart ses motivs da betg pli prolungar il contract da fittanza cun la «Cura & Cultura Srl». El scriva: «L’idea da far or da l’hotel Scuol Palace in hotel per cultura e wellness vegn discutada gia dapi plirs onns cun differents partenaris locals. Ils gestiunaris da l’ultim on han prestà lavur grondiusa e midà il Scuol Palace en in lieu viv en il qual indigens e giasts da noss hotel pon giudair inscunters culturals.» Las midadas actualas en la gestiun èn tenor il management ina cuntinuaziun organica da quest process da blers onns, «mettan però eir la professiunalisaziun da la gestiun da l’hotel en il focus».
En chasa as declera entant cha la gestiun da l’hotel cuntinuescha, chi sajan eir planisads intgins arranschamaints. Ins giavischa però d’avair chapientscha, chi saja anc memia baud per infurmaziuns pli detagliadas. En connex cun la gestiun culturala para anc bler avert. Desditgs èn vegnids actualmain 14 arranschamaints planisads. Auters èn vegnids integrads per l’emprima giada u puspè en la sporta.
Per il turissem è mintga letg impurtant
Tge di l’organisaziun turistica dal svilup en l’hotel a Nairs? Ina gestiun che funcziunass bain beneventass la Turissem Scuol Samignun Val Müstair SA (TESSVM) in mintga cas, sco chî’l directur turistic Bernhard Aeschbacher declera: «Nus vain durant la stagiun ota e tar events per part difficultads da chattar avunda alloschis.» Eir Aita Zanetti, la presidenta communala da Scuol, giavischa ina cuntinuaziun da la purschida. «La vischnanca ha plaschair ed interess cha la chasa saja tant sco pussibel occupada.»
Revista e prevista
Ussa resta la dumonda co ils iniziants da «Cura & Cultura» descrivan ils fatgs: «Cura & Cultura» datti anc adina – almain il num. Ils societaris Tino Andri, Cinzia Regensburger e Julia Brändle han be surdat la societad cun responsabladad limitada, ma betg ils dretgs al num da la firma.
Ma co èsi vegnì adaquella? – Ils societaris din ensembel cun Mo Ibrahim envers la Posta Ladina chi hajan manà la gestiun cun bler’energia, cun creativitad e vaglia d’emprender. Els descrivan tge team grondius chi avevvan e ch’els hajan stgaffì plazzas da lavur per ils collavuraturs a la recepziun, a la bar, ed en il nettamain. Els raquintan co chi hajan a la fin er manà en chasa gestiunaris da restorant e ch’els erian en connex cun las pernottaziuns sin buna via e chi vevian buna speranza chi vegnia dà ad els almain in ulteriur on temp per pussibilitar in svilup. Chi haja però mancà ad els ina ferma investiziun. La gestiun actuala haja gì da far gudogn per pajar ils custs. E propi, l’inscripziun oriunda en il register da commerzi n’inditgescha betg in grond chapital da basa.
Nus essan stads sincers ed avevan fidanza, idealissem e curaschi.
Sch’ins fetschia ad els la rinfatscha dad esser stà naivs, din Tino Andri, Cinzia Regensburger e Julia Brändle: «Nus essan stads sincers ed avevan fidanza, idealissem e curaschi.» Ussa hani l’impressiun dad esser vegnì privà dals fritgs da lur angaschamaint e vegnan ad esser en l’avegnir pli precauts. Perche cha insatge es per els segir: Els vulan cuntinuar, e quai ensemen. Tino Andri di che l’on en l’hotel Scuol Palace saja stà per el sco l’accumplimaint d’in siemi. E ch’il siemi na saja anc betg a fin. Cinzia Regensburger agiunta ch’els tschertgan ussa ensemen in nov lieu – per l’avegnir da «Cura & Cultura».
«Success dovra chapital e know-how»
Posta Ladina: Aita Zanetti, dess l’hotel Scuol Palace star enavant a disposiziun per arranschamaints, e sche gea, co?
Aita Zanetti: La vischnanca ha plaschair ed interess chr la chasa saja tant sco pussaivel occupada. L’hotel Scuol Palace po sco osp esser per arranschamaints cun blers participants e visitadras ina pitga centrala ed ha da tschella vart sco lieu per realisar quellas occurrenzas in scharm tut particular.
Nua vesa la vischnanca schanzas per l’hotel Scuol Palace, nua difficultads?
Grondas schanzas ha l’hotel, scha la simbiosa da lieu cultural particular ed osp classic reussescha. Ensemen cun ils «vischins» istoricamaintg impurtants, sco la Büvetta, la veglia chasa da bogns, il center cultural Nairs e la Chasa Carola hajan ins cunzunt cun la tematica aua minerala bleras pussibilitads. Quai pretenda sper il sectur per cultura e congress gia existent surtut eir üna gestiun d’hotel e gastronomia che funcziuna bain. Il lieu in pau giud via pretenda in effort in pau pli grond. Per laschar cumparair l’hotel puspè en si’anteriura «splendur» èn investiziuns pli grondas indispensablas. Quai pudess esser difficil. Da manar in hotel cun success e da construir la rait da giasts pretenda bler chapital e know-how.
È la cumbinaziun da gestiun d’hotel e chasa d’arranschamaints raschunaivla?
Da principi gea. Nus quintain ch’in hotel viva precis da questa cumbinaziun e saja dependent da quella. Per duvrar l’hotel unicamain sco chasa d’arranschamaints è quel memia grond. Sco gestiun d’hotel isolada e tradiziunala ha il Palace bain passantà durant il 20avel tschientaner buns temps. Quels concepts d’hotel e furmas da vacanzas èn però ozendi antiquads ed ins na po betg predir, scha ed in tge furma ch’ina gestiun unicamain d’hotel vess schanzas.
Sch’ils novs gestiunaris dattan si la sparta arranschamaints/cultura, co po quai vegnir cumpensà?
Quai na pudain nus displaschaivlamain betg respunder a moda fundada. Arranschamaints culturals vivan en emprima lingia dal fieu dals iniziants, damain dil lieu sez. Tuttina fissi donn per il scharm da l’hotel sco er per ils events particulars, sche las localitads impressiunantas da l’hotel Scuol Palace na pudessan betg pli vegnir utilisadas per occurrenzas culturalas.
Il ieu Nairs ha gì ils ultims onns adina puspè da cumbatter cun problems. L’onn passà pareva da midar ina giada. Co vesa la vischnanca da Scuol il lieu ord vista dal svilup regiunal?
Il «Kurhaus Tarasp», sco il Palace aveva num oriundamain, è vegnì construì cun buna raschun a Nairs. A prima vista ed a reguard l’avertura turistica para il lieu ozendi forsa pauc favuraivel. Igl è però uschia ch’en ses stretg conturn sburflan las pli fermas funtaunas mineralas en nossa regiun. Quellas eran pli baud per la medischina las pli impurtantas funtaunas. Nossas strategias mussan che vischnanca e regiun s’identifitgeschan anc adina cun questa ritgezza dad aua minerala. Er sche Nairs n’è anc betg sa dasdà dal tut our da la sieb da Rösaspina – sco umbli da noss’istorgia da cura, wellness e turissem è e resta il lieu per tut la regiun da grond’impurtanza e merita nossa plaina attenziun.
Or da l'archiv: