Il 2048 scroda la concessiun per ils dretgs d’aua a l’Ovra electrica Rain Anteriur (ORA) e quai suenter 80 onns. Uschia è il mument circa 2/3 dal temp da concessiun scadì. Per vegnir da contractar en l'avegnir a moda effizienta cun l’Axpo e per avair ina vusch pli ferma vulan las sis vischnancas da la Cadi (Breil, Trun, Sumvitg, Mustér, Medel e Tujetsch) fundar ina corporaziun da vischnancas. Quai scrivan las vischnancas en in messadi communabel. Las vischnancas da la Cadi possedan communablamain 8,5% da las aczias da la ORA, il chantun 10% ed il rest è en ils mauns da l’interpresa gronda Axpo.
Las proximas sfidas
L’idea è da vegnir da dar dumogn cun ina vusch communabla e cun la corporaziun nova a las proximas sfidas. Uschia ha il concessiunari Ovras electricas Rein Anteriur d’annunziar fin il 2033 (15 onns avant che la concessiun scada), sch’els han insumma interess da prolungar ils contracts. Alura han las vischnancas 10 onns peda da decider mintgina savessa, sch’ellas han interess d’ina prolungaziun u sch’ellas vulan in return a tschep. Ils 10 onns suandants han las vischnancas ed il chantun alura da contractar ils contracts novs u las cundiziuns per in return a tschep. Las vischnancas han alura mintgina da decider ed il chantun ha d’acceptar las decisiuns da las vischnancas.
Cooperaziun duai ir en vigur il 2025
Tschintg da las sis vischnancas da la Cadi han anc quest onn da decider sur da la commembranza a quella corporaziun da vischnancas - quai a lur radunanzas da vischnanca. A Mustér decida il parlament communal sur da la commembranza a la corporaziun. En vigur duai quella ir cun l’entschatta dal 2025.
