La debatta davart las finamiras politicas è in instrument strategic fitg impurtant ch’è vegnì creà l’onn 2009 per integrar il Cussegl grond en la discussiun davart las finamiras che la Regenza preschenta silsuenter cun il program guvernativ, la proxima giada il favrer 2024.
13 finamiras ubain maximas politicas èn vegnidas discutadas mesemna e gievgia en il Cussegl grond. Tranter ils temas da las finamiras surordinadas sa chattan per exempel l’economia, l’energia, la mobilitad e la sanadad publica ch’èn maximas che procuran per dapli discussiun che autras.
Reorganisaziun dal provediment medicinal d’urgenza 2024
La mancanza da medis è il motiv principal ch’il chantun sto introducir gia en quatter mais in nov sistem da salvament. In concept definitiv n’è anc adina betg sin maisa quai che chaschuna in malesser tar la deputada Aita Zanetti. Perquai ha ella vulì savair da la regenza co il provediment da salvament saja organisà a partir dal prim da schaner.
Appel a la promoziun dal turissem
La finamira cun il titel «Economia» prevesa la promoziun dal Grischun sco plazza economica e sco lieu da lavur. Il Cussegl grond ha discutà detagliadamain co ch’ins pudess domiciliar novas interpresas en il Grischun. Era la diversificaziun da l’agricultura e da la purschida turistica è vegnida discutada.
Strategia pertutgant il return a tschep
Per ina viva discussiun ha er procurà la strategia da forza idraulica entaifer la finamira davart l’energia. Plirs deputads han accentuà ch’il return a tschep da las ovras idraulicas dal chantun na saja betg chaussa da las finamiras politicas. Il return a tschep saja chaussa da las vischnancas concessiunarias. Il chantun haja la funcziun d’accumpagnar las vischnancas en la strategia idraulica. Ultra da quai ha il Cussegl grond approvà la finamira da procurar per dapli segirtad en il provediment d’energia cun promover pli fitg las energias regenerablas.
Sfidas per la perioda da planisaziun 2025–2028
La cumissiun per politica statala e strategia dal Cussegl grond ha salvà il mars 2023 ina sesida da planisaziun cun la regenza grischuna. En quell’occasiun aveva ella discutà davart ils trends politics dals proxims onns e lura fixà las 13 finamiras politicas e descrit quellas.
