Il pe da taglia resta a 120 % da la taglia chantunala simpla. Plinavant ha il cussegl da vischnanca prendì enconuschientscha dal plan da finanzas 2017-2021.
Ils ultims onns ha la vischnanca da Mustér fatg fitg buns quints. Quai surtut pervia da daners ord il return a tschep da l’Ovra da Russein, dal tschains d’aua e da la vendita d’energia. Uschia èsi stà pussaivel da reducir marcantamain ils daivets – e quai da 17.4 (2006) a 3.9 milliuns francs (fin da 2014). Mo per ils proxims onns vul la vischnanca da Mustér investir, e sche tut las investiziuns previsas vegnan realisadas s’augmentan ils daivets puspè.
Investir ca. 20 milliuns francs
La vischnanca da Mustér vul investir ils proxims sis onns ca. 20 milliuns francs. Las grondas investiziuns pertutgan il Center da sport e cultura, la sanaziun da la chasa da scola, chanalisaziun e serenera e vias communalas e forestalas. Mo questas investiziuns stoppian succeder en etappas, di il president communal Francestg Cajacob. Daivets da 25 milliuns na fissan betg supportabel per la vischnanca.
Flaivla forza finanziala
Pervia da la flaivla forza finanziala (cashflow) sto la gronda part da las investiziuns dentant vegnir finanziada cun augmentar ils daivets. Sco Francestg Cajacob ha ditg fissan ca. 2 milliuns francs in bun cashflow, daners ch’ins po prender enta maun. Deplorablamain haja la vischnanca da Mustér mo la mesadad.