La populaziun ha inoltrà bleras protestas ed objecziuns encunter il nov project da la vischnanca, da restrenscher il traffic sin tscherts tschancuns e signalisar las vias tenor la nova prescripziun. La publicaziun latiers en il fegl uffizial da mez favrer numerescha ils scumonds tenor tschancun e fracziun.
Nus vulain reducir in zic il traffic sin quellas vias, nua che nus na vulain betg che l'entira publicitad charrescha.
Sin passa 50 tschancuns da via savess ins en il futur mo pli charrar cun ina lubientscha speziala. Per exempel sin las vias dad alp a Ruschein e Siat. Damain infurmativa è la publicaziun da var 12 paginas cura ch'i sa tracta dal co ch'i duess funcziunar en il futur cun il sistem da lubientschas spezialas. Il manader planisaziun e construcziun da la vischnanca da Glion, Andreas Pfister, di ch'i dettia anc il basegn d'infurmar la populaziun pli detaglià. Uschia organiseschia la vischnanca ina saira d'infurmaziun, ils 20 d'avrigl a Ruschein.
La suprastanza tracta mintga brev, protesta u inoltraziun ch'è vegnida fatga.
En il mument è la suprastanza vi dad analisar las numerusas brevs per silsuenter adattar tscherts punct vi dal project sche quai è necessari. En in proxim pass trametta la vischnanca il project a la Polizia chantunala che vegn a relaschar las disposiziuns latiers. Lura datti anc ina giada ina publicaziun da l'ordinaziun definitiva en ils proxims mais. La vischnanca quinta da montar las tavlas il fanadur u avust.