Il resultat da la votaziun davart l'iniziativa dal pievel che dumonda ina revisiun da la constituziun, prendì en da redimensiunar il parlament ni reintroducir la radunanza communala, ha procurà per inqualina dumonda tar ils 25 parlamentaris da Glion. Uschia ha la moziun da Gian Marco Bianchi vulì savair, co la suprastanza vegn a proceder. Tenor Marcus Beer, il president communal, vegnia la suprastanza ha contactar il comité d'iniziativa per savair discutar co la cumissiun da constituziun duessi sa cumponer.
Clar è però, che quella cumissiun astga consister da maximal 20% parlamentaris. L'intent da la suprastanza fissi da metter ensemen ina cumissiun enfin la sesida dal settember. Daco ch'i è vegnì uschè lunsch ch'il suveran ha acceptà l'iniziativa, avain nus dumandà inqual parlamentari e parlamentaria.
Gudogn annual 2022 da rodund 61'000 francs
Il parlament communal ha approvà il quint annual 2022 che serra cun in surpli dal retgav da rodund 61'000 francs, quest tar expensas da rodund 34.1 milliuns frans. Il cashflow munda a var 3.4 milliuns francs, tge che saja legraivel, uschia il schef da finanzas da la vischnanca da Glion. Las investiziuns nettas da 4.2 milliuns francs han pudì vegnir finanziadas per 80% cun agens meds.
Plinavant ha il parlament communal approvà il quint 2022 dal provediment d'aua Gruob che serra cun in gudogn da rodund 98'000 francs. Cumpareglià cun l'onn avant è il gudogn pli modest, quest surtut perquai ch'il gudogn ord la vendita da l'electricitad idraulica era pli pitschens pervia da la mancanza d'aua.
Cun ina finanziaziun preliminara da 1 milliun francs per construir en il futur il local da pumpiers ed il lavuratori communal, affirmescha il parlament da metter d'in maun daners per il project futur.
