Tenor Roman Cantieni, l'anteriur suprastant da la vischnanca da Glion ed iniziant da l'iniziativa, duess la vischnanca da Glion puspè introducir la radunanza communala. Tenor Lorenz Alig dal comité d'iniziativa fiss in parlament redimensiunà cun per exempel 15 parlamentaris ina pussaivladad per il futur. Omadus na vesan en la situaziun actuala cun in parlament da 25 commembras e commembers betg la schliaziun ideala, tge che lur iniziativa reflectescha.
Cuntraproposta dal parlament
Il parlament vesa quest auter ed ha formulà ina cuntraproposta. Gian Marco Bianchi, il parlamentari ed autur da quella proposta, sco era la presidenta dal parlament communal, Gierina Gabriel, vulan en reacziun sin l'iniziativa proponer da crear ina cumissiun da constituziun che na duess betg esser occupada cun dapli che 20% dals commembers actuals dal parlament. Plinavant constituissan ils iniziants la mesadad da quella cumissiun. L'idea fiss dad examinar la constituziun pass per pass e silsuenter reveder sche necessari. Per ils iniziants na va quest pass betg lunsch avunda, Lorenz Alig vesa en questa cumissiun il privel che l'idea iniziala na vegnia betg realisada.
Midar tar in model cun departaments
In auter punct impurtant da l'iniziativa è la midada dal model da direcziun tar in model cun departaments. Uschia fissan las suprastantas ed ils suprastants responsabels per in departament e la paisa executiva na fiss betg uschè fixada sin il president. Qua vesan tut ils politichers ch'eran da la partida durant la discussiun da podium potenzial per midadas.
Il pievel decida
Tar la discussiun da podium che la Partida liberala ha organisà en l'aula da la chasa da scola a Glion èn dapli che 60 audituras ed auditurs sa radunads. Il suveran da Glion ha da votar il 18 da zercladur per l'iniziativa u la cuntraproposta. La debatta è lantschada.
