L'hotel bandunà en la Val Sumvitg fascinescha. Il coloss regorda vi dal temp cura ils osps da cura visitavan quest lieu spezial, ed el regorda vid in'investiziun che n'ha betg purtà fritgs en ils onns 1970. Ils bajetgs che l'investur tudestg Ernst Ludwig Schulz aveva bajegià 1974 èn curt suenter ids en ina «sien da Rosaspina», quai enfin oz. Las portas èn stadas serradas per il grond public.
Ils bajetgs cun storas crudadas, barcuns serrads e bogn senza aua, laschan imaginar las viandantas ed ils viandants che van sperasvi, co i pudess vesair or endadens. El lai forsa imaginar co ils osps passentavan lur vacanzas en la Val Sumvitg en il temps passà. Inqualina ed inqualin ch'èn vegnids al di da las portas avertas han emprendì da nudar en il bogn, in pèr persunas han anc lavurà en il manaschi.
La visita dals vischins
Sonda a bun'ura n'era anc betg segir sche la visita da la glieud plain mirveglias è propi pussaivla. Ina bova aveva bloccà la via en la Val Sumvitg. Ma la finala hai tuttina funcziunà e la glieud e vegnida en gronda quantitad. Rolf Diefenbacher ed exponents da l'Allianza dal Center han organisà ina sentupada en in dals foyers da l'hotel.
La glieud ha suenter in pled pudì scuvrir il lieu, ir a spass tras ils sulers, en las chombras, en cuschina, en il bogn cuvert, en la bar cun iral da tgeiels, en il tschaler da vin e sin la terrassa sin il tetg. En ils lieus ils pli zuppads e lontans da l'hotel èn las visitadras ed ils visitaders ì cun las glischs da lur telefonins sin la tschertga d'ina pitschna aventura visuala: En cuschina èn la vaschella ed ils magiels tschentads si, sco sch'il persunal avess bandunà l'hotel giu dal flatg. Il tschaler plain cun buttiglias da vin tudestg daventa cun il temp aschieu. Vi da la bar en l'auzada sut èn anc ils utensils en la bar e las glistas da pretsch vi da la teca.
L'hotel è la perditga da la materialitad e sia decadenza en il curs dal temps. La visita mussa co ils carstgauns èn fascinads dad objects e bajetgs vegls ord funcziun. Daco ir a visitar ina ruina u in bajetg vegl? I sto avair da far insatge cun la regurdientscha e l'imaginaziun: Pertschaiver sco igl è ina giada stà u sco ch'igl avess pudì esser.
Il manaschi duai cumenzar la proxima stad
En il mument ha il nov possessur dal «Bogn Tenigia», Rolf Diefenbacher, prendì en funcziun il bajetg. Ins vul en in emprim pass midar il stgaudament e controllar las installaziuns da sanitad. I duai dar in stgaudament da zinslas. En in segund pass vul il possessur sanar ils bajetgs uschia ch'ins sa cumenzar cun il manaschi d'hotel la proxima stad. Tenor l'um da Eglisau duai l'hotel dar albiert a glieud cun impediments e persunas che han in burnout.
Nus vulain crear in lieu, nua che glieud cun impediments po ir en vacanzas.
Enfin ussa hajan ins gì osps en las quatter abitaziuns dal chalet sper il bajetg principal. Quels sajan vegnids per passentar lur vacanzas en la Greina. Ins vegnia en mintga cas betg a spazzar bajetgs existents. L'hotel da l'onn 1909 ch'è en in schlet stan, na vegnia en il mument betg renovads. Per quest intent tschertga Rolf Diefenbacher ulteriurs investurs.
