La Bogn Tenigia SA en Val Sumvitg è vendida. Il nov possessur è Rolf Diefenbacher, in impressari dal chantun Turitg, ch'ha cumprà l'areal da 6 hectaras cun tut ils stabiliments, las funtaunas ed il guaud che tutgan latiers. El vul dar nova vita a l'hotel che n'è dapi 45 onns betg pli en funcziun.
Diefenbacher ha surpiglià las aczias ed uschia l'areal dal Bogn Tenigia da la famiglia Schulz da la Germania ed ha fundà ina nova societad d'aczias: la «Tenigerbad Gruppa Chur AG». Davart il pretsch da cumpra na vulan las partidas involvidas betg infurmar, ha Rolf Diefenbacher ditg. Uschia va l'era da la famiglia Schulz suenter passa 50 onns a fin. L'onn 1970 aveva la famiglia cumprà il bogn Tenigia e bajegià in nov hotel. Mo paucs onns pli tard ha quel lura puspè serrà.
Tge daventa or da l'hotel da cura anteriur?
I na vegn betg pli a dar in bogn da cura. Ils trais bogns ch'i dat en l'hotel u sin l'areal na vegnan tenor Rolf Diefenbacher betg pli en acziun. Ils bajetgs construids en ils onns settanta duaian survegnir ina sanaziun miaivla. En il bajetg da l'anteriur hotel è planisà da metter en urden las chombras da giasts ed en il bajetg che collia il nov ed il vegl hotel è planisà da far chombras da «Lodge» cun pussaivladad da cuschinar.
Las emprimas chombras duaian esser a disposiziun als giasts la primavaira 2024. La Tenigerbad Gruppa Chur AG sa drizza surtut ad in circul dad osps, numnadamain quel da persunas cun handicaps. Ma era per tut l'autra glieud duai l'hotel star a disposiziun.
Il manaschi duai restar avert en l'avegnir mintgamai davent da la primavaira fin l'atun. Cun quest concept sa schlia il problem da l'access che n'è betg segirà durant l'enviern fin tar il Bogn Tenigia.
Bogn Tenigia
-
Bild 1 von 5. Rolf Diefenbacher, il nov possessessur dal Bogn Tenigia. Bildquelle: RTR.
-
Bild 2 von 5. Sin quest tetg pudessi dar cellas solaras. Bildquelle: RTR.
-
Bild 3 von 5. I spetga blera lavur, per exempel far urden qua. Bildquelle: RTR.
-
Bild 4 von 5. La primavaira 2024 duain ils emprims osps durmir qua. Bildquelle: RTR.
-
Bild 5 von 5. L'ustaria dal Bogn Tenigia. Bildquelle: RTR.
Dal resort da luxus ad in lieu bandunà
En ses meglier temp è il Bogn Tenigia stà in resort da luxus per far curas d'aua minerala. Cun l'aua da la Val Sumvitg possian ins curar mals e catars da tuttas sorts, stat scrit en vegls prospects. En ils onns enturn il 1900 ha il directur Stanislaus Caplazi carmalà numerus giasts cunzunt da la Germania en la Val Sumvitg. Cun la Segunda Guerra mundiala han ils osps dentant entschet a mancar. Er ils collavuraturs da l'hotel han sentì la guerra.
La guerra ha lura er muntà la fin da l'hotel. Il 1951 ha el serrà sias portas ed è daventà proprietad da la Banca Chantunala Grischuna. Lezza ha anc insaquants onns dà a tschains l'hotel a duas soras Ferroni. Ellas han purschì champs da vacanzas per uffants en l'hotel. Dentant il luxus aveva bandunà la val.
Or da l'archiv: