Il territori da skis dad Andermatt e Sedrun è vegnì collià ed avert uffizialmain sin la stagiun 2018/2019. Alura è sa mussà che blers giasts dad Andermatt vegnan era sin la vart da Sedrun cun skis e per vegnir sin lezza vart hai num traversar la Val Val. Cunquai che las sutgeras construidas il 1988 èn vegnidas en ils onns, èsi savens da spetgar. Uschia saja stà cler ch'ils stabiliments ston vegnir remplazzads. Quai vesia er Vail Ressort, ch'ha cumprà il territori avant rodund dus onns, uschia, di Silvio Schmid, mainaproject da l’Andermatt Sport SA. El è responsabel per il remplazzament da las sutgeras a Val Val. Cura ch’ins ha dentant cumenzà a planisar il project è sa mussà che l’entira val è en zona cotschna. Quai è era stà surprendent per las pendicularas, di Silvio Schmid.
Zona cotschna – ina surpraisa
Il 2019 ha il chantun valità da nov la situaziun da privel a Val Val e mess l’entira val en zona cotschna. Uschia era ils stabiliments existents da las duas sutgeras. «Quai n’era betg enconuschent a nus sco pendicularas, ma ch’il chantun fa da temp en temp talas valitaziuns novas è ina buna chaussa», di Silvio Schmid. Tuttina fissan els stads leds sch’ils responsabels avessan contactà els e dumandà cussegl. Els sajan tuttina gia passa 30 onns en quest lieu ed hajan experientscha, ma quai na duai betg esser ina reproscha al chantun. Uschia hai giu num chattar soluziuns e quellas èn la construcziun da lavineras. Quellas vegnan uss realisads sin omaduas varts da la val ed uschia pon las staziuns a val da las duas sutgeras vegnir en ina zona blaua ed era vegnir remplazzadas, di Silvio Schmid.
Dus projects che ston vegnir realisads il medem mument
Per vegnir da remplazzar las duas sutgeras dovri uss dus projects che vegnan realisads il medem mument. Per las lavineras èn las lubientscha gia qua. Ma cumenzar cun la construcziun il november fetschia en las muntognas pauc senn. Perquai tirian els uss en offertas per esser pronts da cumenzar a la fin da la stagiun l’avrigl, declera Silvio Schmid, ch’è blers onns stà mainafatschenta da las pendicularas da Sedrun e suenter la colliaziun da las pendicularas da Sedrun-Andermatt.
Grond travasch da construcziun sin il Cuolm Val
L’auter onn vegnia quai probabel a dar bler traffic da construcziun sin il Cuolm Val. La raschun saja che Sedrun-Solar realiseschia l'implant quasi en il medem sco las sutgeras. Uschia saja probabel la pli impurtanta incumbensa durant la stad da guardar che quai na dettia nagins conflicts, era betg cun ils purs e la vischnanca, accentuescha Silvio Schmid. Ma sch’ins guardia quants runals e sutgeras ch’els hajan construì ils ultims onns, lura saja pussaivel da far quai aifer ina stad.
