La cumpra dal territori da skis Andermatt-Sedrun tras l'interpresa Vail Resorts è sut tetg. Ed uschia è la responsabladad per il territori uss en ils mauns dal gestiunari da territoris da skis american. Ils Americans possedan ina cumpart da 55%, la Andermatt Swiss Alps 40%. Ils ulteriurs 5% èn en ils mauns d'acziunaris singuls.
Cun realisar la transacziun han Vail Resorts e la Andermatt Swiss Alps era confermà da vulair investir 149 milliuns francs en la destinaziun Andermatt-Sedrun. Quai scriva la Orascom Development Holding ch'è involvida. 110 milliuns da quai duain vegnir investids directamain en il schlargiament da las pistas, implants da naiv e pendicularas sco er en la gastronomia. Ils ulteriurs 39 milliuns vul il territori da skis investir en il svilup da la fatschenta da coc tar ils hotels, l'infrastructura e per expander Andermatt Reuss e quai sur ils proxims trais fin tschintg onns. Quels 39 milliuns vegnan vitiers tar ils 350 milliuns che la Andermatt-Sedrun ha gia vulì investir.
Mike Goar è schef dad Andermatt-Sedrun
Il zercladur è vegnì enconuschent che Mike Goar daventa il nov manader da fatschenta da las pendicularas Andermatt-Sedrun. Il davos ha el gì questa funcziun tar Park City Mountain a Utah – il pli grond territori da skis collià en ils Stadis unids. La destinaziun Andermatt-Sedrun da l'investider egipzian Samih Sawiris duai enconuschentamain vegnir en mauns da la societad americana Vail Resorts. Quella maina enconuschentas destinaziuns da skis sin l'entir mund, tranter auter Vail, Beever Creek en il Colorado u Whistler Mountain en il Canada. Andermatt-Sedrun è l'emprima destinaziun en l'Europa.
