La suprastanza communala da Tujetsch na vegn betg pli a persequitar vinavant il project per ina tur da lain tar la ruina dal casti da Putnengia a Dieni. Quai scriva la vischnanca da Tujetsch en la gasetta locala la Tuatschina.
La radunanza da vischnanca dals 22 da matg aveva decis en ina stretga decisiun che la vischnanca possia s’engaschar administrativ per il project, tuttina manchia il sustegn per il project e sin fundament da pliras objecziuns saja la decisiun crudada da betg pli persequitar il project, uschia la suprastanza. La dumonda consultativa per la tur pertutgava sulet in engaschi da l’administraziun en favur da recaltgar ils daners necessaris tar sponsurs e donaturs. Daners communals na pon betg vegnir impundids per il project.
Acts èn vegnids surdads al Forum Cultural Tujetsch
Tut ils acts èn vegnids surdads al Forum Cultural Tujetsch. André Schmid, il president dal forum cultural, ha confermà ch’els hajan survegnì ils acts. Il mument haja dentant la realisaziun da l'archiv cultural prioritad per l’uniun. Sch’els vegnan a realisar pli tard il project casti da Putnengia, na possian ins betg dir il mument. Cunquai ston ils daners gia recaltgads vegnir restituids sin la fin da l'onn.
Lunga istorgia da la tur da Putnengia
La ruina da Putnengia è ina tur or dal temp medieval ed ella è la sedia da la schlatta dals da Putnengia. La persunalitad la pli enconuschenta da questa schlatta è Pieder da Putnengia, avat da la claustra da Mustér ed ina da las trais persunas ch’aveva engirà il 1424 sut l’Ischi a Trun. La tur è vegnida renovada avant paucs onns dal Forum Cultural Tujetsch e la finamira da quel è gia dapi passa 20 onns da reconstruir sin l'areal ina tur da lain.
Dentant, il mument ha la construcziun da l’archiv cultural prioritad per l’uniun e las resursas per in proxim project mancan. Perquai avevan la vischnanca e la suprastanza communala da Tujetsch prendì enta maun il pensum da recaltgar ils daners en il num dal Forum Cultural. Ma, la radunanza da vischnanca dals 6 da december 2023 ha renvià la dumonda da prefinanziar tut cun daners communals, daners ch’il Forum Cultural avess gì da pajar enavos. Dus mais pli tard aveva il project alura, malgrà tut, survegnì la lubientscha da construcziun.
Tge critica datti cunter il project?
Per Bruno Berther, ch’abitescha a Rueras, èsi stà cler ch'i na dovria nagina tur da lain tar la ruina da Putnengia. El saja s’exprimì a la radunanza da vischnanca dal december en favur da stritgar l’entir project e surtut l’agid finanzial communal. Che la vischnanca vuleva cuntiunuar cun questas lavurs, quai na correspundia betg a la veglia dal pievel, di Bruno Berther. Per el saja cler che la decisiun democratica saja da respectar e che la vischnanca veglia en questa chaussa simplamain sfurzar atras il project. Uschia saja el era s'exprimì a la radunanza da vischnanca da mesemna saira ils 22-05-2024 cunter il project, di l’um pensiunà ch’ha quasi vivì vita duranta a Rueras e che vegn or da la famiglia dals proprietaris da terren. Entant posseda ses frar la ruina da Putnengia.
Cun questa decisiun da la suprastanza è il project uss per la vischnanca giud maisa. Sche il project vegn persequità vinavant dal Forum Cultural Tujetsch resta anc avert.
