La «Casa d'attempai s. Martin» a Trun ha dapi bainprest trais onns ina gronda digren dal persunal da tgira. Bleras persunas ch'han lavurà là dapi onns han demissiunà en quai temp. En il mument n'èn pervia da la mancanza da persunal 8 da 60 letgs betg occupads.
Tenor Donat Nay, il manader da la chasa s. Martin, saja la pandemia stada l'origin da quella digren. Suenter il temp da corona haja dà ina fluctuaziun pli gronda, perquai che tschertas persunas eran liadas durant quest temp vi da la chasa. Retschertgas da RTR demussan dentant autras raschuns per las numerusas demissiuns en la tgira. En discurs cun passa in tozzel persunas ch'han bandunà la chasa s. Martin, vegnan ils suandants motivs adina puspè numnads:
- La direcziun tractia il persunal cun memia pauc respect e na fidia betg a la glieud.
- Ils manaders fetschian memia pauc per tgirar il persunal, la lavur na vegnia betg appreziada.
- Dumondas ch'il persunal haja plazzà tar ils superiurs na sajan betg vegnidas respundidas.
Per Donat Nay n'èn quellas reproschas betg giustifitgadas. Ins possia adina far reproschas, ma ins na duessi betg far quest davos il dies. El saja adina stà averts per communitgar e renviescha la critica. El stettia bun per quai ch'el saja responsabels, ma pauschalas n'acceptia el betg.
Ins ha fatg sbagls, ma pauschalmain na lasch jau betg valair questas reproschas.
Plinavant di Donat Nay ch'el tractia tut la glieud equivalent ed haja adina in'ureglia averta per il persunal.
Il president da la cumissiun chasa stat davos ses manader
Daniel Tuor, il president da la Cumissiun chasa, admetta che la chasa s. Martin saja en ina pitschna crisa. Da quellas fluctuaziun da persunal na haja el anc betg vis en ses temps sco president da la cumissiun. Visadas da plazzas sajan adina colliadas cun ina tscherta malcuntentientscha, uschia Daniel Tuor, quai saja dapertut uschia. Ma dapertut na maina la malcuntentientscha betg tar uschè bleras demissiuns sco a Trun. Tar las reproschas envers la direcziun di il president da la cumissiun chasa ch'el stettia fermamain davos il manader da la chasa.
Uschia n'enconusch jau betg il manader da la chasa. E tar quai stun jau.
La cumissiun n'haja enfin uss betg pudì eruir las raschuns per l'exodus dal persunal, quai n'hajan ins betg pudì analisar. Ins haja tschertgà il discurs, ma quai n'haja betg adina funcziunà. Uschia saja grev d'analisar las raschuns.
Nagin squitsch da la politica
En la Cumissiun chasa sesan per l'auter er ils presidents communals da Breil, Sumvitg e Trun. Na fissi betg l'incumbensa dals presidents da far squitsch sin la direcziun, cura ch'ins auda dals problems che scurlattan la chasa s. Martin? Quai la dumonda al president communal da Trun, Dumeni Tomaschett. Squitsch saja il fallà, ins discuteschia en la cumissiun, ma la direcziun stoppia era savair tge ch'è il problem. I manchia là vi da la communicaziun.
Squitsch è il fallà. Nus pudain discurrer cun la direcziun, ma lezza stuess era savair tge ch'è il problem, e betg udir da quai davos dies.
Che la communicaziun da la cumissiun e da la direcziun saja manglusa, vegn era reproschà da las persunas ch'han demissiunà, uschia che las reproschas vegnan d'omaduas varts.
Co i va exact vinavant cun l'analisa da las undas da demissiuns e la malcuntentientscha dal persunal, n'è anc betg cler. Tenor Daniel Tuor, il president da la cumissiun chasa hajan ins tschertgà agid ordaifer.
