En la chasa d'attempads, la «Pflegewohngruppe Vals» èsi en il mument malruassaivel. D'ina vart è la contribuziun al deficit da la vischnanca per l'onn passà stada trais giadas pli auta che budgetada. Quai munta che la vischnanca ha pajà radund 360'000 francs. Da l'autra vart è la situaziun da persunal tut autra che legraivla. Tenor il president communal e vicepresident da la cumissiun da la chasa d'attempads, Stefan Schmid, sajan ils custs en la tgira s'augmentads. Pervi da la mancanza da persunal sajan actualmain be nov dals indesch letgs occupads.
Vitiers vegn ch'il manader da tgira e da l'economia da chasa ha demissiunà suenter svaris cun la direcziun. Trais collavuraturas hajan sinaquai er visà la plazza. La «Pflegewohngruppe Vals» è partenaria da la chasa d'attempads «Da casa « a Vella . La direcziun communabla e la cumissiun da la chasa a Val èn en la critica dal persunal. Ina supervisiun externa duai uss sclerir la situaziun.
Quint annual da l'onn 2022 e credit per via tar staziun da pendicularas
Ultra da quai ha la radunanza communala approvà unanimamain il quint da l'onn 2022 che serra cun in gudogn da var 585'000 francs. Quai tar expensas da bunamain 10 milliuns francs. Las investiziuns nettas muntan a 1,3 milliuns francs.
Plinavant ha il suveran da Val approvà unanimamain in credit da 260'000 francs per renovar e catramar la via tar la staziun sut da las pendicularas ed uschia colliar il quartier da Valé.