La sonda e dumengia mainan ils organisaturs puspè atras la cursa da turas da skis Trofea Péz Ault. Els spetgan var 150 persunas al start. Quai surtut ils sportists professiunals, uschia era quels che lutgan per il campiunadi svizzer.
Preparar la Trofea Péz Ault
-
Bild 1 von 5. Las ed ils sis voluntaris da la cursa Trofea Péz Ault ch'han preparà las lavurs da l'emprim di. Bildquelle: RTR.
-
Bild 2 von 5. Luca Brunold, il schef da cursa sin la Muotta. Bildquelle: RTR.
-
Bild 3 von 5. Ir cun bandieras sur la Muotta giu Gendusas. Bildquelle: RTR.
-
Bild 4 von 5. E puspè da viadi ensi per fitgar dapli bandieras enfin la Muotta. Bildquelle: TR.
-
Bild 5 von 5. Vista giu da la Muotta envers Verclisa. Bildquelle: RTR.
Bandieras melnas, cotschnas e verdas
La gievgia la damaun van ils sis voluntaris enturn il schef da la cursa, Luca Brunold, en il territori das skis da Mustér per cumenzar cun las preparaziuns per la Trofea Péz Ault. Davent da l’ustaria Lai Alv – nua che l’equipa ha ses deposit – va ella cun bandieras da trais colurs si dies vinavant en la muntogna.
Ina gruppa va a marcar ils curs dal toc Verclisa-Ault, tschella parta sin la Muotta per puspè vegnir engiu envers Gendusas. Omaduas gruppas fan la medema lavur, fitgar bandieras en la naiv. La vista e schletta, senza l’apparat da navigaziun GPS èsi grev da vesair insatge. Mintga pèr meters fetga Luca Brunold en ina bandiera. Ina giada arrivada giusut, va l’equipa puspè ensi per ussa fitgar anc dapli bandieras verdas ed uschia definitiv definir la ruta per las sendas. Las bandieras verdas marcheschan l’ascensiun, las cotschnas la descensiun, las melnas muntan prender giu ils skis, metter quels sin ils satgados ed ir a pè in toc, explitgescha Luca Brunold. Plinavant marcheschan bandieras melnas in privel.
Nossa lavur èsi da duvrar uschè paucas bandieras melnas sco pussaivel, pia ch’il privel n’è betg existent. Ma quest vegn grev cun uschè pauca naiv.
Silsuenter datti anc ina gronda lavur da far las sendas per la cursa. Tenor la prognosa meteorologica datti anc naiv. Uschia sto quella lavur vegnir fatga avant la cursa.
La stagiun da skis da tura na vegn magari betg lunga
A l’ur da las preparaziuns da la Trofea Péz Ault ha RTR dumandà il guid da muntogna e responsabel per la segirtad da las cursas, David Berther, davart la stagiun d’ir cun skis da tura.
Per ir turas na hai mai gì blera naiv. Igl ha adina in zic crappa che mira ora che fa quai malsegir.
Igl haja dà en il dretg mument en il december naiv. Mirà sur l’entira stagiun haja dentant dà pauca naiv, savens saja stà bell’aura. Ina curta fasa haja dà in privel da lavinas, ma en general la stagiun stada buna fin uss. Las destinaziuns da skis han pudì cumpensar cun naiv artifiziala – sper pista n'è quai betg pussaivel. Perquai na saja betg stà ina stagiun cun blers dis cun naiv da pulvra.
Sche la stagiun da turas vegnia ussa buna dependa sch’i dat si els auts anc in pèr giadas naiv. Ma i na dettia betg la pli lunga stagiun, manegia David Berther.