La dumengia ha la cursa stuì vegnir adattada pervia dals ferms vents la notg sin dumengia ord raschuns da segirtad. Uschia è era la passascha spectaculara d’ascender tras il couloir vegnida stritgada. Per las atletas ed ils atlets n’ha quai betg fatg gronda differenza, di il president dal comité d’organisaziun Giochen Bearth. Per ils organisaturs hai dentant gì num lavur supplementara ed adattar la cursa anc la dumengia la damaun. Ma els sajan propi cuntents ch’els hajan pudì manar atras la cursa senza incaps ed era las atletas ed ils atlets sajan stads cuntents ed hajan ludà la gronda lavur prestada da las radund 70 voluntarias e voluntaris, accentuescha Giochen Bearth.
Bunas prestaziuns grischunas
Las atletas ed ils atlets grischuns, u cun ina relaziun en in Grischun, han pudì persvader. Uschia è Nico Delcolmo vegnì la sonda en la cursa «vertical» da la staziun a val da las pendicularas a Sontga Catrina fin a Caischavedra segund ed Arno Lietha dal Partenz terz. Sulet Martin Anthamatten da Zermatt ha anc dumagnà l’ascensiun en pli curt temp ch’ils dus Grischuns.
La dumengia ha quai dà trais cursas en ina. Il meglier temp dal di è currì il giuven vallesan Yoann Farquet, segund spert è stà Nico Delcolmo e terz è vegnì Marco Wildhaber ch’abitescha a Tusaun, e ch’ha gì gudagnà l’onn passà la «Trofea Péz Ault». Tar las dunnas ha Victoria Kreuzer da Zermatt gudagnà.
Era l’equipa ollandaisa cuntenta
La terza cursa entaifer la trofea da quest onn, il campiunadi ollandais, è medemamain stà in success. Ils radund 30 atlets èn arrivads sauns a l’arrivada ed han uschia per la terza giada pudì far lur campiunadis sin territori da Mustér. Uss hai num returnar en regiuns main alpinas e main d’enviern.
Quest onn dapli annunzias e dapli naiv ch’ils onns passads
Cursas da sport da skis da turas na datti betg bleras en la Svizra Orientala. Il sport è cunzunt popular en la Svizra franzosa e perquai vegnan la gronda part da las curridras ed dals curriders or da lezza regiun. Tuttina, la cursa populara Trofea Péz Ault è enconuschenta en la scena da skis da turas era perquai che quai dat regularmain campiunadis durant quellas cursas.
Quai è era quest onn il cas. Uschia vegnan gist trais cursas fatgas sin il medem traject. Per l’ina la cursa populara «Trofea Péz Ault» nua che mintg’in po ir a la partenza ed era gruppas da dus e trais curriders pon sa participar. Quest onn vegnan parallel era organisadas las cursas dal «Swiss Cup» dal Club alpin svizzer (SAC). E la finala datti anc il campiunadi ollandais.
Quai haja surtut sco consequenza che dapli participantas e participants van a la partenza, di il responsabel per la cursa Luca Brunold. En cumparegliaziun cun l’onn passà nua che radund 60 persunas èn idas a la partenza van questa onn passa 140 persunas al start a Caischavedra en il territori da skis da Mustér.
Fitg bunas relaziuns d’enviern
Per pudair manar atras talas cursas èsi necessari da candidar. Els hajan uss gì il cletg che Mustér saja vegnì tschernì dals responsabels dal Club alpin svizzer. Ma els hajan era stuì far cumpromiss, per exempel cun il termin. Perquai hajan els stuschà quel per duas emnas enavant. Quai portia l’avantatg che las relaziuns da lavinas e da privel saja sumegliant a l'enviern, cun naiv e vents e betg sco usità relaziuns da primavaira, nua ch’il privel è cunzunt tras temperaturas pli autas e lavinas bletschas, accentuescha Luca Brunold.
-
Bild 1 von 2. Las lavurs da preparaziun èn difficilas, surtut sche quai dat naiv, alura èsi puspè da far ils dus vials necessaris. Bildquelle: Trofea Péz Ault.
-
Bild 2 von 2. Luca Brunold, il responsabel per la cursa durant las lavurs da preparaziun en il pli spectacular lieu, il coloir. Bildquelle: Trofea Péz Ault.
Ma els hajan quasi stuì ir suenter il chalender da cursas e perquai saja la cursa da skis da turas er il medem di sco il pli grond event da sport en il Grischun, il Maraton da skis engiadinais. In dus voluntaris hajan perquai fatg pli gugent il maraton da skis ed era dus trais curriders. Ma tuttina hajan els era chattà quest onn avunda voluntarias e voluntaris ed il pli principal saja ch’el possia sa fidar era totalmain sin lur experientscha e sin lur tenuta, accentuescha Luca Brunold.
Il punct ch’ins na possia betg influenzar è l’aura, uschia èn las prognosas betg propi idealas, ma tuttina saja la cursa da dumengia segira e cun ils campiunadis cumpetitiva e spectaculara, di Luca Brunold. Il pli impurtant saja adina che tuttas atletas e tuts atlets vegnan sauns e salvs puspè en l’arrivada, alura saja tut ì bain, di il Lumnezian ch’è per la terza giada responsabel per la cursa.