Dals 22 enfin ils 24 da december han gì lieu a Flem, Laax e Falera tests da massa da Corona. Pussaivel è quella acziun stada pervia da l’iniziativa da l’Arena Alva a Laax. E l'interess è stà grond: Entaifer in di e mez han gia 1'400 persunas sa laschà testar. Ils resultats n'èn anc betg enconuschents.
Oriundamain aveva l’interpresa previs da testar mo l'agen persunal cun tests da massa. Quai per evitar ch’il virus sa derasia en l’atgna interpresa. Suenter passa trais mais da planisaziun ed organisaziun ha l’interpresa ussa a disposiziun plirs tschient tests da corona per di. Tenor infurmaziun dal manader da fatschenta da l’Arena Alva, Marcus Wolf, na dovrian els betg tut la capacitad per l'agen persunal. Uschia hajan els organisà cun las vischnancas da Flem Laax e Falera in'acziun nua ch'era la populaziun po sa laschar testar.
Senza agid dal chantun
Ils emprims contacts tranter l'Arena Alva ed il chantun Grischun pertutgant tests da massa han gì lieu gia avant trais mais.
L'interpresa fa ses tests da massa cun ina emprova da spida. Quai è tenor Marcus Wolf bler pli empernaivel che la procedura da stuschar il bastunet dal nas en sco tar ils tests da massa ch'il chantun ha organisà avant duas emnas en l’Engiadina e las valladas dal sid. Ils tests a Flem, Laax e Falera sajan cumparegliabels cun ils tests da PCR che vegnan fatgs dals medis ed ospitals tar pazients cun sintoms da corona. Ils resultats èn enconuschents suenter maximalmain 36 uras.
L’Arena Alva è en stretg contact cun il chantun Grischun e coordinescha sias acziuns cun quel. La finamira communabla è da chattar uschè bleras persunas asintomaticas sco pussaivel per uschia puspè vegnir en ina situaziun almain in zic en direcziun da la normalitad. Tant il chantun sco l’interpresa vulan cuntinuar cun las acziuns da testar era il proxim onn.
