Las pendicularas dal Grischun restrenschan l'access als territoris da skis. Il dumber maximal da las persunas vegn reducì per in terz. Las cartas dal di vegnan limitadas. Quai han las pendicularas e l'organisaziun da marketing Grischun vacanzas communitgà oz communablamain. Per quintar or il dumber da persunas lubidas han ils territoris stuvì inditgar al chantun il dumber dal meglier di da la sesiun passada - quel vegn lura reducì per 30 pertschient.
Empustar ordavant ils tickets
Turists dal di fan bun da s'infurmar davart las capacitads e da cumprar las cartas ordavant. Ils territoris da skis grischuns èn averts sur ils firads. La regenza grischuna valitescha dentant la situaziun mintga di da nov.
Ils exempels Arosa e Veulden
Dentant co funcziuna quai lura propi cun limitar il dumber da skiunz? Nus avain dumandà in pitschen ed in grond territori da skis.
Poss jau cun mes abunament da l'onn adina ir cun skis?
Gea, tant a Veulden sco er a Arosa/Lai fan ils abunaments e las cartas da sesiun part dal contingent da persunas che dastgan ir sin la pista. Er chartas ch'ins cumpra per exempel en hotels ubain shops da sport ad Arosa/Lai garanteschan ch'ins po ir sin pista.
Stoss jau reservar chartas da skis online?
A Veulden n'è quai betg pussaivel cunquai ch'i na dat betg ina purschida online. Là resta la cassa averta ed ins po be cumprar là il bigliet dal di. Igl ha bigliets uschè ditg sco i ha.
A Lai /Arosa vegn recumandà da empustar il bigliet online. Là pudess quai esser tut tenor dumber da visitas ch'ins na survegn betg pli in bigliet sch'ins vul spontan ir sin cassa a cumprar in. Il mument haja quai dentant anc avunda bigliets per tut ils dis tranter las festas. Dis da bell'aura èn dentant gia cudeschads dapli che quels da main bell'aura.
Co ves'jau sch'ils territoris han anc capacitads?
A Veulden na ves'ins betg quai, per esser segir pon ins dar in telefon. I vegn er signalisà sper via cur ch'ils bigliets èn vendids.
A Lai/Arosa pon ins guardar sin la pagina d'internet ubain sin ils chanals da social media cur che las capacitads èn cuntanschidas.
Poss jau anc cumprar bigliets per in viadi singul?
Per ir cun scarsola ubain far spassegiadas pon ins en omadus territoris er cumprar chartas. A Veulden quintan quellas dentant sco charta dal di, a Lai/Arosa na vegnan quellas chartas betg quintadas giu dal contingent.
Co vegn guardà che las distanzas vegnan tegnidas en?
A Veulden vegn signalisà las distanzas, a Lai/Arosa èn er persunas engaschadas che guardan che tut tegnan en las distanzas. Er vala in obligatori da mascrinas. I sto dentant esser endretgas mascrinas, be ina schlingia na quinta betg. Er la polizia fa magari controllas en ils territoris da skis.
Svizra Turissem porscha survita per sportistAs
Sportistas e sportists d'enviern duain survegnir svelt ina survista, tge che vala nua. Ils giasts sajan numnadamain malsegirs. Sin sia plattafurma online infurmescha Svizra turissem perquai davart las mesiras da corona e las differentas regulaziuns chantunalas.
Ils 18 da december aveva il cussegl federal serrà per l'entir pajais restaurants ed indrizs da temp liber e da cultura. En il medem mument avev'el lubì a chantuns cun in svilup epidemio-logic favuraivel da puspè avrir restaurants - u en il cas cuntrari - da relaschar ulteriuras restricziuns sco per exempel puspè serrar territoris da skis.
