Terminà ils tests da massa - 15'151 persunas testadas – 150 positivas

Cun 150 cas positivs sin 15'151 tests correspunda la rata da da positivitad uschia ad 1%. Quellas cifras mussian che persunas asintomaticas contribueschian en moda considerabla a la derasaziun ed a la cuntinuaziun da la pandemia, evaluescha l'Uffizi da sanadad. Limitaziuns da contacts sajan perquai er vinavant in element central per franar la pandemia.

Il test territorial en il Grischun dal Sid na furneschia betg in maletg definitiv, exprimia però fitg bain la situaziun mumentana, scriva il chantun. Gia questa emna vegnia perquai cumenzà en tschertas regiuns cun tests posteriurs.

Finamira betg cuntanschida

La finamira da testar en total 20’000 persunas ha il chantun manchentà. Il facit saja dentant tuttina positiv di Martin Bühler, il schef dal stab directiv chantunal. Uschia haja l'organisaziun e la collavuraziun tranter vischnancas e chantun funcziunà fitg bain. Ed els hajan uss tuttina ina buna basa per cuntinuar cun la lavur da far tests.

Problems cun manar tras ils tests n'haja dà nagins durant l'entira fin d'emna, scriva il chantun. Tscha e là haja sulettamain dà retards cun ils resultats dals tests.

La regenza grischuna vegn a decider damaun mardi davart las mesiras da corona e gist suenter communitgar.

L'acziun:

Il Minisguard declera pertge ch'igl è impurtant da chattar persunas infectadas e che na san nagut da lur infecziun. Ed en il Telesguard dals 4 da december mussa RTR co ils tests da massa en Engiadina vegnan fatgs.