L'analisa genetica mussia cleramain: Ils trais lufs giuvens ch'èn crudads giu l'atun tar l'alp da Trin na derivan betg dals dus animals geniturs – M30 ed F07 cun num scientific – dal triep dal Calanda. Cun quai saja sa confermada la supposiziun ch'i dettia dapi quest onn in nov triep da lufs en il Grischun, scriva l'uffizi. Il triep saja da chasa sin il territori communal da Trin.
Dal triep nov tar Trin n'è betg enconuschent bler
Dapli da quest triep n'è anc betg enconuschent: Uschia na sappia l'uffizi n'er betg, sch'i dat auters lufs giuvens ch'ils trais morts, pertge che quels èn morts u nua ch'ils dus animals geniturs sa chattan actualmain. Anc avert èsi schebain ils lufs giuvens han gì la pesta da chauns u betg.
Per l'uffizi èsi cler, ch'il segund triep da lufs n'è betg l'ultim che vegn a sa furmar en il Grischun:
Sin basa da las observaziuns da quest onn e pervia da las analisas fatgas en quest connex stoi probablamain vegnir fatg quint il proxim temp cun ulteriurs trieps da lufs en il Grischun.
RR novitads 10:00+
