-
Bild 1 von 5Legenda: L'urset american è arrivà pervi d'in accident en la patologia da l'universitad da Berna. El e vegni sut il tren. RTR, Fabia Caduff -
Bild 2 von 5Legenda: Avant che l'autopsia cumenza dat la scheffa dal center per medischina d'animals selvadias, Marie-Claire Ryser, in egliada sin l'urset american. RTR, Fabia Caduff
-
Bild 3 von 5Legenda: Ensemen cun dus students cumenza Michelle Imlau a controllar l'animal. RTR, Fabia Caduff
-
Bild 4 von 5Legenda: ... fin sin cor e gnirunchels vegn tut controllà. RTR, Fabia Caduff
-
Bild 5 von 5Legenda: L'autopsia mussa ch'igl è in urset american ch'era nutri bain e che la collisiun cun il tren è propi stada cun gronda probabilitad il motiv da la mort. RTR, Fabia Caduff
Mo cun stivals, vestgì suren e guants sterils dastgan ins entrar en la halla d’autopsia. Là ans spetga in urset american. El è mort probabel pervi d'in accident cun in tren: La fatscha è sfratgada si e la patta a dretga è destruida.
Michelle Imlau, dal center per medischina dad animals selvadis examinescha l’urset american. Las mesiras sco pais, lunghezza, grondezza da mauns e da pes vegnan registradas e ramassadas per la perscrutaziun.
La halla da la patologia è gronda: I dat tschintg maisas per far autopsias, la glisch è fitg fraida però clera e la savur è plitost ina ch’ins ha da sa disar vidlonder.
Normalmain vegniss anc stratg giu il pail da l’urset american. Ma causa la collisiun cun il tren, n'è il pail betg pli intact e vegn laschà londervi. Michelle Imlau piglia enta maun il cuntè lung: Il venter vegn taglià si ed ils organs prendids ora in suenter l’auter.
Cun ina evidenza ed ina rutina, taglia Michelle Imlau dapart l’animal. Ed entant ch'ella piglia ora ils organs resta temp per discurrer cun la scheffa dal center per medischina dad animals selvadias, Marie-Pierre Ryser. Ella declera ch'ins fetschia las examinaziuns patologicas per sclerir ils motivs da la mort, sco era per vesair sch'ils animals han malsognas. Quai saja impurtant per diagnostitgar a temp epidemias ed era pudair reagir.
I va per la protecziun dals animals, dentant era per la sanadad dals umans e dals animals da chasa sche nus chattain las malsognas ad uras.
Surpraisas dettia adina puspè, cuntinua Ryser. Mintgatant guardia or suenter in accident, ma lura chattian els ora ch'in fraudulader haja mazzà l’animal. Quest onn hani gia secziunà passa 400 animals selvadias. Tranter auter ils trais lufs da Trin. Però era in urs è gia vegnì sut ils cuntels da Marie-Pierre Ryser.
Tar animals gronds da rapina vegn controllà dapli che tar controllas da rutina sco tar l'urset american. Quel è uss examinà a fin e l’autopsia mussa che l’accident da tren e ferm probabel. Provas da sang vegnan anc prendidas per controllar sche l’animal ha parasits.
En bundant in'emna po il cas da l'urset american vegnir mess ad acta. L’autopsia è fatga ed il vestgì suren, ils stivals e guants sterils pon puspè vegnir tratgs ora.
RR actualitad 07:00