Il settember 2023 aveva Fadri Bisatz cumenzà sco mainagestiun dal Spital regiunal Surselva. Suenter stgars dus onns dat el giu quest post. El n'ha betg prendì posiziun suenter la disditga, persuenter il cussegl d'administraziun da l'ospital. Envers RTR ha Thomas Buchli, il president dal cussegl d'administraziun ditg, ch'els deploreschian fitg la decisiun, Bisatz saja in mainagestiun che s'identifitgeschia fitg cun l'instituziun.
Sco raschuns per la disditga numna Thomas Buchli il squitsch creschent e l'aut pensum da lavur sco facturs centrals. Tuttina saja il cussegl d'administraziun stà surprais che la disditga vegnia ussa. Pertge l'ultim temp hajan il cussegl d'administraziun e la suprastanza da la SanaSurselva puspè pudì rinforzar la confidenza ed uschia sa concentrar sin l'avegnir.
Nus avain dentant percurschì ch'il squitsch extern sco er dapli lavur interna han smatgà ils ultims mais sin sias schuialas.
Cunquai ch'il manader da la partiziun da tgira aveva demissiunà l'october passà per immediat aveva il mainagestiun Fadri Bisatz surpiglià e manà ad interim er anc questa partiziun. Sper quai èn era las discussiuns davart la finanziaziun da l'ospital stadas fitg preschentas.
Il cussegl d'administraziun va uss a la tschertga d'ina nova u in nov mainagestiun per l'ospital.
Nova sfida en il sectur da sanadad
Fadri Bisatz sa legria sin novas sfidas en il sectur da sanadad, hai num en la communicaziun. El aveva cumenzà avant stgars dus onns sco CEO dal Spital regiunal Surselva e surpiglià il post da Claudia Käch ch'era ida il 2023 anticipadamain en pensiun.