Franco Caviezel, è l'ospital regiunal a Glion sa manevrà en in pulit caos cun la reorganisaziun?
L'unda da demissiuns da l'onn passà pon ins cleramain chapir sco reacziun sin questa reorganisaziun en la tgira. Quai conferman ils responsabels da l'ospital sco era autras funtaunas. Mo che la situaziun è gia stada tendida avant quella reorganisaziun, è enconuschent a nus dapi dus onns. Quai tenor infurmaziuns da pliras funtaunas. Quellas vusch han gia lura ditg che la malcuntentientscha e la fluctuaziun en la tgira saja gronda – quai era pervi da decisiuns da metter ensemen partiziuns ed alura puspè far midadas. Era tar las spendreras hai dà avant in onn bleras demissiuns.
Ins po dir che questa reorganisaziun da l'onn passà è stada il dagut damemia en il butschin.
Tenor il president dal cussegl d'administraziun da l'ospital – Thomas Buchli – è il manader da la tgira ì da libra veglia. La basa da dretg na lubeschia betg da tradir detagls da sia demissiun per immediat. Mo Bucheli conceda ch'igl haja da far cun la reorganisaziun.
Gea, il manader da la tgira ha dà giu ses post per immediat l'october passà. Quai suenter ch'el è stà passa dus onns sin quest post. Durant quest temp è el stà responsabel per la reorganisaziun.
Da quellas persunas che nus avain discurrì ha el survegnì in schlet attestat. La communicaziun saja stada schletta ed el n'haja betg prendì serius ils basegns dal persunal. Pliras persunas han ditg ch'el haja cun las midadas procurà per dischurden e saja la fin lura sez ì.
Igl è dentant d'accentuar ch'ina reorganisaziun e mesiras da spargn èn mai popularas tar il persunal. Ma las demissiuns, cun quella dal schef, mussa che la collavuraziun n'ha betg funcziunà sco ella avess stuì.
Demissiun, malcuntentientscha, critica envers ils responsabels – Pons era chapir u interpretar quai uschia ch'ils responsabels da l'ospital regiunal a Glion na prendan betg serius il persunal da tgira?
Quai n'è betg pussaivel da respunder cun in cler Gea u Na. Ils responsabels da l'ospital stuessan garantir ina buna tgira ed en il medem mument spargnar per ch'il deficit na vegnia betg memia gronds. Spargnar han els vulì cun metter ensemen las partiziuns da la tgira en ina partiziun interdisciplinara. Quai vul dir: Las persunas da la tgira han da cuvrir pliras partiziuns enstagl da lavurar sin quella ch'ellas èn spezialisadas. Tscherta glieud da la tgira crititgescha che la qualitad da la tgira sminueschia entras quai. Vegn vitiers che pli bleras persunas che bandunan l'ospital e mender che las cundiziuns da lavur vegnan. Il resultat è lura era ch'il persunal rutinà chala. Ed en muments cura ch'i gira dapli, sco l'enviern, sto l'ospital engaschar persunal temporar per stuppar la rusnas. Tge che custa lura puspè dapli e la qualitad patescha perquai ch'il persunal temporar è be in curt mument en il manaschi. Nus pudain discurrer d'in circul vizius. E bleras demissiuns na muntan betg mo persunal malcuntent mabain era custs supplementars ed il squitsch che crescha per tuts.
Sco tschels ospitals regiunals èn noss chantun – scriva è quel en Surselva cifras cotschnas ed è sut squitsch da spargnar. Sto era spluntar per agid finanzial tar las vischnancas purtadras. Savend quai, Franco Caviezel, n'èsi lura betg inditgà e giustifitgà ch'ins va sur ils cudeschs – era en la tgira?
Gea, igl è cler che l'ospital sto spargnar. Tenor mia valitaziun vegnan dentant ils problems strategics en il mument dads vinavant al manaschi. Dapi dus onns stuess l'ospital reponderar co el vul ir vinavant en l'avegnir. Ed era la possessura da l'ospital, la corporaziun da vischnancas Sanasurselva, stuess communitgar a l'ospital tge purschidas che la regiun dovra per il provediment da sanadad da l'avegnir. Mo quai va pe zop, sco nus avain vis avant in mais tar al charplina en la suprastanza da la Sanasurselva. Gia la dumonda co laschar analisar l'ospital d'ina firma externa ha procurà per in eclat.
Igl è nairas uras che l'ospital vegn uss examinà independentamain, quai era per che la glieud che lavura là sco era ils pajataglia san, en tge direcziun ch'i duess ir. En il mument pari a mai d'esser in vi e nà senza strategia concreta. E las dumondas cardinalas n'èn betg respundidas: Tge purschidas dovra la Surselva en il provediment da sanadad e tge ospital dovri en l'avegnir?
U ditg auter: la Sanasurselva avess da far l'ospital tenor ils basegns betg ils basegns tenor la purschida da l'ospital actual.