Il nov cussegl administrativ da la Reit da sanadad Surselva SA ha uss da festinar e da guardar ch'il manaschi prenda catsch sco ch'i tutga. En gnanc trais onns ston las novas structuras persvader, uschiglio ristga la Reit da sanadad da perder las vischnancas sco acziunarias. E gliez fiss il bancrut simbolic per la reit da sanadad.
L'urari è ambizius per ina lavur ch'ins dastga ruassaivlamain numnar ina fusiun cun tactica da salami. Forsa han ils responsabels gest pervia da quai elegì otg chaus en il cussegl administrativ per pudair far frunt a l’enorma sfida che spetga quellas e quels che han instradà e che mainan ussa il process da fusiun.
En il cussegl administrativ hai en in pèr persunas dal fatg che na vegnan per gronda part oriundamain betg da la regiun. Betg surstar fai, che tschintg da las otg persunas da quest cussegl èn ord la politica regiunala. Adumbatten tschertgan ins ina u pliras represchentantas da quellas persunas che lavuran di per di en la tgira u en auters secturs da las instituziuns da sanadad.
Il cor da la nova Reit da sanadad Surselva è il Spital regiunal Surselva. Ins na po betg snegar che senza lez fiss in provediment da sanadad integrà mo pli la sumbriva da l'idea oriunda. Ins na po era betg snegar ch'il spital regiunal ha da sbatter cun sia atgna sanadad sch'ins guarda sin las finanzialas e la situaziun da persunal. Senza in plan da sanaziun che persvada las Sursilvanas e Sursilvans, pudess l'idea da fusiunar tut las instituziuns da sanadad survegnir in infarct.
Ussa dovri il mussament ch'ils responsabels tschertgan e chattan las schliaziuns che possibiliteschan a la nova societad il provediment da sanadad integrà che funcziunescha tenor las visiuns actualas.
E sch'il temp vegn strentg sin il tschancun final ston inqual anc dar giu in mandat u l'auter per restar vardaivel cura la nova organisaziun prenda si la la lavur operativa l'onn 2027.
Franco Caviezel
Redactur Surselva