Il schef da l'Arena Alva Reto Gurtner sa mussa cuntent cun l'andament da las fatschentas da l'onn da gestiun 2023/24. I saja in onn plain transfurmaziuns – tant en l'organisaziun sco era cun blers projects. Il dumber d'entradas da bun 1 milliun saja creschì modestamain, però cuntentaivel, scriva il president e delegà dal cussegl administrativ Reto Gurtner en ses rapport da l'onn. Pli cuntent è el però cun las pernottaziuns ch'èn bain creschidas mo per 2% sin 158'806 – però è la stagiun d'enviern stada fitg buna.
Sut il stritg da la gruppa Arena Alva restan però la svieuta netta ch'è sa reducida levet sin 116 milliuns francs, cumpareglià cun ils 120 milliuns da l'onn avant. L'ebitda è però sa reducì per bun 14% sin stgars 24 milliuns francs. Tuttina cuntenta sa mussa la gruppa Arena Alva, perquai che l'onn passà haja cuntegnì entradas extraordinarias – sco per exempel tras la vendita dad abitaziuns.
Ed era suenter che plirs projects èn realisads, sco da remplazzar la Freestyle Academy a Laax Murschetg cun la Freestyle-Kathedrale, ubain era la reorganisaziun da la structura da la firma, resta tenor Gurtner la transfurmaziun permanenta. Uschia èsi previs d'investir en l'avegnir en l'infrastructura ed en ils servetschs da prestaziun.
