L’enviern passà ha la naiv mancà. Uschia è vegni mesirà uschè pauca naiv sco anc mai en il territori da skis da l’Arena Alva, ha il mainafatschenta Markus Wolf ditg. Uschia na saja era betg da smirvegliar ch’il gudogn net da la stagiun è sa reducì sin prest 2,5 milliuns francs. Il 2021/2022 muntava quai gudogn anc 21,7 milliuns francs.
-
Bild 1 von 3Legenda: Il hangar a Crap Sogn Gion era emplenì tochen sin la davosa plazza. Philipp Ruggli -
Bild 2 von 3Legenda: Reto Gurtner raquinta durant la radunanza sur da l'istorgia ma era adina puspè sur da pussaivlas visiuns. Philipp Ruggli
-
Bild 3 von 3Legenda: Il nov cussegl d'administraziun da sanester: Romano De Giorgi, Reto Poltéra, Thomas Camenzind, Senta Gautschi e Markus Wolf. Philipp Ruggli
Uschia hajan ins era stuì prender tschertas mesiras malempernaivlas, di Wolf a la radunanza generala la mesemna. Per exempel reducir il persunal, quai vul dir transfurmar plazzas da lavur stablas en talas stagiunalas, ni era l’auter enviern engaschar damain persunal, ha declerà Markus Wolf. Ma era respargns vegnan ins a far tar il material, uschia stoppian segir pliras investiziuns anc spetgar in dus onns, quai saja era spargnar, uschia Wolf.
Visiuns restan domena da Reto Gurtner
La radunanza dals acziunaris da l’Arena Alva è era adina ina show da Reto Gurtner. Uschia preschenta el mintgamai sias visiuns per l’avegnir. Quest onn ha el cunzunt accentuà las stentas en connex cun il nov FlemX, in project cun il focus sin ils giasts da la stad, di Reto Gurtner. Ma era l’idea d’ina colliaziun da la staziun da tren da Versomi en direcziun Flem ed il territori da skis è ina da las visiuns da Reto Gurtner. Sch’ins realiseschia quella colliaziun, quai fissi innovativ, ma el saja conscients che tals projects dovrian temp, bler temp, uschia Gurtner.
Arena Alva na cumpra betg hotel Waldhaus
La sperdita d’in tal hotel da tradiziun saja ina frida per l’entira regiun, gnanc sulet per l’Arena Alva. Ma els na vegnian betg a cumprar il hotel, era sche l’interess era ina giada avant maun. Ideal fiss ina gruppa che ha gia experientscha en il sectur d’hotels d’auta qualitad, quels vegnian era d’emplenir l’hotel. Las fermezzas da l’Arena Alva na sajan betg exnum da chattar en la hotellaria, era sch’els hajan cun il Rock Ressort grond success, uschia Reto Gurtner.
La chareschia ha procurà per custs pli auts
Era la chareschia e las expensas pli autas per la planisaziun d’agens projects hajan procurà per dapli custs, uschia Markus Wolf. La planisaziun per la stagiun d'enviern 2022/23 na saja betg stada simpla cunquai ch'ina pussaivla mancanza d'energia avess pudì periclitar il manaschi d'enviern, uschia Markus Wolf en il rapport annual. La lavur latiers saja stada colliada cun gronds sforz. Plinavant saja l'ennavaziun durant l'enviern cun fitg pauca naiv stada ina sfida.
La glieud haja puspè gust da far vacanzas en l'exteriur e quai sa mussia tar la destinaziun turistica. Tge dimensiuns che quai haja en il futur, vegnia anc a sa mussar. La svieuta restia dentant sin in aut nivel, uschia Markus Wolf. Quai vul dir che la svieuta netta è tar passa 120 milliuns francs. L'onn 2021/22 era quella tar radund 130 milliuns francs. Il gudogn net da la stagiun 2022/23 munta prest 2,5 milliuns francs, la stagiun da record 2021/22 era quel tar 21,7 milliuns francs, la stagiun 2020/21 tar 2,6 milliuns francs.