L'Arena Alva tschertga ina nova persuna che maina la fatschenta. Il CEO Markus Wolf banduna l'interpresa turistica mez da december, scriva l'Arena Alva en ina communicaziun.
Markus Wolf è stà a la testa da l'Arena Alva per quatter onns. Durant quest temp haja dà differentas crisas sco per exempel ils auts pretschs d'energia e la chareschia. Quai temp difficil haja l'interpresa dumagnà bain, schizunt cun cifras da record. Tar la discussiun per il futur da l'Arena Alva saja sa mussà che Wolf ed il cussegl administrativ hajan differentas opiniuns co che l'Arena Alva duai vegnir manada en il futur. La communicaziun citescha Wolf, che di ch'i possia dar ch'ins haja differentas opiniuns, tge valurs e structuras ch'èn impurtantas per il futur. Or dal respect envers las possessuras ed ils possessuras veglia el schliar la relaziun professiunala cun l'Arena Alva. Reto Gurtner, il president dal cussegl administrativ, surpiglia la direcziun ad interim. El deplorescha la decisiun, e di en la communicaziun ch'el saja engraziaivel a Wolf per ses engaschi.
L'Arena Alva è ina interpresa turistica che cumpiglia tranter auter pendicularas, hotels, shops, scolas da skis en la destinaziun da vacanzas Flem Laax Falera.
