Las studentas ed ils students d’architectura robotica da l’ETH a Turitg vegnan a realisar in project a Caschlatsch ina ruina sin intschess da la vischnanca da Mustér. Tge ch’ins po dir è che quai dat ina construcziun da lain, ma tge ch’è la finala il product, ina plattafurma da survista, ina sculptura u insatge tut auter è anc betg cler, di in dals professurs ed iniziants Fabio Gramazio. L’architectura robotica saja ina furma da construir structuras cumplexas cun nizzegiar las datas ed uschia puspè unir las spartas da construcziun e planisaziun. La finamira è da stgaffir ina simbiosa da tradiziun ed innovaziun, dal mastergn e la tecnologia nua che l’uman ed il roboter creeschan structuras cumplexas declera Fabio Gramazio.
-
Bild 1 von 7. Stefan M. Seydel en la baselgia da Sontga Gada durant sias explicaziuns. Bildquelle: Daniela Kienzler.
-
Bild 2 von 7. Ils iniziants Stefan M. Seydel e Ursin Huonder a Caschlatsch. Bildquelle: Daniela Kienzler.
-
Bild 3 von 7. Las studentas ed ils students da l'ETH Turitg a Caschlatsch sut Mumpé -Medel. Bildquelle: Daniela Kienzler.
-
Bild 4 von 7. Las studentas ed ils students da l'ETH Turitg a Caschlatsch sut Mumpé -Medel. Bildquelle: Daniela Kienzler.
-
Bild 5 von 7. Las studentas ed ils students en il biro da Ursin Huonder a Mustér. Bildquelle: RTR.
-
Bild 6 von 7. Il professur Fabio Gramazio en discurs cun in dals impressaris regiunals che vegn a participar al project. Bildquelle: Daniela Kienzler.
-
Bild 7 von 7. L'object da referenza Kizuki-au preschentà e construì il 2019-2022 en il Giapun. Bildquelle: ETH Turitg.
Daco a Mustér?
L’idea è naschida tar Stefan M. Seydel, piunier da medias socialas e dapli blers onns sesents a Mustér. El ha contactà l’architect Ursin Huonder cun la dumonda da far a Caschlatsch in project cun studentas e students da l’ETH. E strusch dus mais pli tard è il project arrivà gia a Mustér. L’idea dal inscunter saja da mussar e laschar sentir las studentas ed ils students la regiun per alura era pudair realisar lur ideas, declera Ursin Huonder che ha medemamain studegia e scolà a l’ETH. Il proxim temp vegnian els ad accumpagnar il project che va en la fasa da realisaziun proxim favrer era cun visitas a Turitg. Durant il proxim semester da stad vegnan las studentas ed ils students a planisar e construir a Turitg cun roboters lur idea e quai en format in tar in, declera Ursin Huonder. Suenter èsi previs da realisar tut a Caschlatsch. Idealmain proxima stad, ma l’emprim stoppia vegnir sclerir tut las lubientschas uffizialas avant da realisar el lieu in tal project. La vischnanca è optimistica che la collavuraziun portia in resultat che tuts possian beneventar, era sch’ins na sa il mument anc betg tge che vegn realisà.