Suenter ina lunga discussiun e diversas pitschnas midadas haja il Cussegl da vischnanca approvà il mardi saira unanimamain il preventiv 2024 da la vischnanca da Mustér. Il preventiv quinta cun in gudogn da passa 100'000 francs. Ultra da quai quinta la suprastanza communala l’onn 2024 cun in’atgna finanziaziun da var 1,1 milliuns francs ed investiziuns nettas da radund 7,2 milliuns francs.
Pe da taglia nov 99%
Suenter ina debatta intensiva ha il Cussegl da vischnanca sbassà per l’onn 2024 il pe da taglia per entradas e facultad da 110% sin nov 99%. En connex cun sia strategia da taglias aveva la suprastanza communala proponì al cussegl ina reducziun annuala da 2% sur 6 onns. Questa proposta n’ha betg chattà sustegn. La taglia sin immobiglias duai restar tar 1,7‰. Il resultat dal preventiv 2024 cuntegna gia la reducziun da taglia concludida.
Il preventiv 2024 vegn suttamess al referendum facultativ. Plinavant vegn la decisiun da la reducziun da taglia suttamessa a la proxima votaziun a l’urna.