Mustér - Massa projects turistics ed innovativs sin maisa

La sala Peter Kaiser en claustra da Mustér è s’emplenida fin sin l’ultima plazza. Quai mussia l’interess vi dal svilup da la vischnanca, ha il president communal René Epp accentuà. Els hajan vulì tematisar uschè blers projects sco pussaivel, ma betg per surchargiar l’occurrenza, ma perquai che tut quels projects sajan actuals.

Ils projects en detagl:

• Sco emprim è vegnì preschentà in dals projects communals impurtants dals ultims onns. La renovaziun e l'engrondiment dal center da sport Fontauna. Sco Clemens Berther ha infurmà vegnian els anc a finir tut las lavurs en l’intern quest onn e las lavurs ordadora l’auter onn. Era la finanziaziun saja garantida e per gronda part èn ils daners gia avant maun.

• Alura èn ils dus projects solars vegnids preschentads che vegnan ils 22 d’october en votaziun.

• Era preschent era il directur da l’Andermatt-Sedrun Sport SA e da la Vail Resorts, Mike Goar. El ha, cun ses american, purtà tempra mundiala en l’entira discussiun. Suenter èn ils proxims projects vegnids tematisads, tranter auter il nov restaurant a Valtgeva, ma era la realisaziun da las sutgeras a Val-Val.

• Era tematisada è vegnida la punt pendenta planisada e la finala ils project da las pendicularas da Mustér. Marcus Weber, l’investur e president dal cussegl d’administraziun da las pendicularas ha fatg attent che la scursalera vegnia anc quest onn realisada, ma els spetgian anc sin las lubientschas da la vischnanca da dal chantun.

Vischnanca vul promover da construir abitaziuns

In dals temas ch’è vegnì tematisà è la realisaziun da spazi d’abitar. La vischnanca na possia betg sezza realisar abitaziuns novas, ha Paul Schmidt, il gerà responsabel, ditg. Ma cun la scola a Segnas saja in object en possess da la vischnanca che pudessi vegnir nizzegià per quest intent.

Per far quai saja prudent da fundar ina cooperativa, ha ditg Paul Schmidt. El ha appellà da s’annunziar tar el, tut tgi ch’ha interess vi d'in tal project. Pertge la cooperativa portia avantatgs, per exempel na veglian ins betg far gudogn cun il spazi da viver scart, e realisar spazi da viver per tuts. Ma qua stoppian els l’emprim chattar persunas interessadas, ma els veglian anc quest onn cumenzar ed alura guardar nua che la via mainia, uschia Paul Schmidt.