2 milliuns per la «Nova Sentupada»
La radunanza communala da Laax ha acceptà dus credits per il center da sentupada «Nova Sentupada». Quai èn mintgamai in milliun da la vischnanca politica ed in milliun da la fundaziun Pro Laax. La gronda part da la finanziaziun surpiglia la plaiv catolica da Laax, numnadamain 3 milliuns. Il nov lieu per las uniuns, nua ch’ellas pon far trenaments ed inscunters è situà gist dasper la baselgia parochiala da Laax.
La radunanza communala ha era decis da sclerir sch'ina installaziun solara sin las fatschadas fa senn. Sin tetg è gia planisà in'installaziun solara. Sche l’investiziun surpassas la summa da credit dada, alura vegniss la proxima radunanza communala a decider sur d’in credit supplementar. Sche tut va tenor plan duessan las lavurs cumenzar il 2026. L’avertura è planisada per il december 2027.
Scoletta veglia daventa in edifizi multifuncziunal
Era investir vul la vischnanca da Laax en la scoletta veglia. La chasa situada gist dasper il Lag Grond duai vegnir nizzegiada en futur da la gruppa d’uffants pitschens per la termagliera e da la giuventetgna che va en il stgalim superiur. Era duajan las tualettas publicas gia vegnir fatgas quest onn ed avertas sin la stad. Il num da l'edifizi multifuncziunal è «SPAZI» e duai vegnir en funcziun gia la fin da l’onn 2025, surtut era per porscher a las uniuns localitads da trenament durant che la chasa «Nova Sentupada» vegn construida. La vischnanca ha concedì in credit da 1,5 milliuns francs.
-
Bild 1 von 2. Bildquelle: RTR.
-
Bild 2 von 2. Bildquelle: RTR.
Nova suprastanta
Suenter la demissiun dal suprastant Othmar Schärer ha la radunanza da vischnanca gì d’eleger ina successura u in successur. En tut èn trais persunas stadas a disposiziun per il post vacant. La radunanza ha la finala elegì Isabelle Schleiss en suprastanza e Silvia Kägi sco substituta.
Quint pli pitschen ch’il 2023
Vinavant ha la radunanza communala da Laax acceptà unanimamain il quint annual dal 2024 che serra cun in gudogn da 3,7 milliuns francs. Il 2023 aveva la vischnanca da Laax fatg in gudogn extraordinari da quasi 7,5 milliuns francs. La raschun era la valurisaziun da pliras parcellas che han la finala purtà quasi 3 milliuns dapli entradas il 2023. Sco il president communal Franz Gschwend ha ditg sin dumonda da RTR saja il gudogn actual en rama dals ultims onns.