La radunanza communala da Laax ha approvà gievgia saira il credit da 22,13 milliuns francs per ina surbajegiada da tschintg chasas cun abitaziuns per persunas attempada e per indigens. Ils votums èn cun 189 cunter 9 vuschs cleramain stads a favur dals bajetgs che la vischnanca vegn a construir en la Via Davos Baselgias a Laax.
Surbajegiada Davos Baselgias a Laax
-
Bild 1 von 5. Plan da situaziun. Bildquelle: MAD vischnanca Laax / Loop AG.
-
Bild 2 von 5. Visualisaziun da las tschintg chasas cun abitaziuns per persunas attempadas ed indigens. Qua cun vista sin il Crap da Flem. Bildquelle: MAD vischnanca Laax / Loop AG.
-
Bild 3 von 5. La nova surbajegiada duai tranter auter porscher localitads per la Spitex Selva, tge che va a prà cun las abitaziuns per persunas attempadas. Bildquelle: MAD vischnanca Laax / Loop AG.
-
Bild 4 von 5. Visualisaziun dal coc da la surbajegiada. Bildquelle: MAD vischnanca Laax / Loop AG.
-
Bild 5 von 5. Visualisaziun dal spurtegl da la Spitex Selva. Bildquelle: MAD vischnanca Laax / Loop AG.
Duas mustgas cun in schlop
Il project «Abitar en la vegliadetgna» ha en mira da pussibilitar a persunas attempadas da viver independentamain en lur ambient usità. Furmas d'abitar libras da barrieras duain permetter da restar en l'ambient famigliar, cun la pussaivladad da profitar dal sustegn da la cuminanza. Sper quai datti anc il project «Spazi d'abitar pajabel per indigens»: Ils pretschs da locaziun creschents a Laax han mess sut squitsch bleras famiglias a Laax, uschia Franz Gschwend, il president communal da Laax. Cun ils dus projects sin las parcellas nr. 1007 e 1009 en il quartier Davos Baselgias vul la vischnanca cumbatter las tendenzas. Uschia vul la vischnanca bajegiar trais chasas per il project d'abitar en la vegliadetgna e duas ulteriuras chasas per abitar pajaber per indigens. Sper las abitaziuns vegnia a dar in café sco lieu da sentupada ed ils biros da la Spitex Selva vegnan integrads en la surbajegiada. L'uniun saja creschida ils davos onns e dovria dapli spazi.
Ils custs da construcziun per ils dus projects muntan a totalmain 22,13 milliuns francs. Ina calculaziun da rentabilitad positiva mussia che l'investiziun vegnia a purtar in gudogn a lunga vista, uschia il president communal da Laax. Las entradas da tschains da locaziun annualas muntan a 924’000 francs, sin 10 onns portia l’investiziun in gudogn da bun 240’000 francs. Las lavurs da construcziun duain cumenzar il 2025 e vegnir terminadas la fin dal 2027.