Ils 23 da settember 2022 aveva Franz Gschwend declerà a la FMR ch'i saja anc avert, tgi che bajegia la finala. Il president communal aveva confermà che la davosa parcella en la zona da mastergn Pardanal maschadada per commerzi ed abitar saja adattada spezialmain per ina chasa da persunal. Igl è ina parcella ch'è en possess da la vischnanca politica.
Nus essan vid sclerir, co nus pudessan trair a niz il meglier ella.
Curt avant, il settember 2022, aveva la radunanza communala da Laax approvà la revisiun da la planisaziun locala che cumonda da mobilisar surfatschas libras. Damai ch'il territori da Pardanal è attribuì ad ina zona maschadada per abitar ed industria, è la parcella era pertutgada dal sforz da surbajegiar.
L'investura «Fortimo» è sa retratga
Ina emprima skizza da l'uffizi da bajegiar aveva mussà ch'ins pudess construir sin la parcella 1575 ina chasa da persunal cun enfin 110 studios. Quai ch'era lura anc mo in'idea, è en il fratemp avanzà ad in project concret. Uss è il project en la procedura per la lubientscha da bajegiar. I n'è betg mo in, mabain dus projects da duas societads:
- La Seehof Beteiligungs AG vul bajegiar ina chasa cun 15 abitaziuns da 2,5 chombras e 25 studios sin tschintg auzadas ed ina garascha sutterrana,
- la societad simpla Mulin Nova ina chasa da mastergn e d'abitar cun 18 studios.
Ils dus projects sajan cumbinads in cun l'auter, di il president communal Franz Gschwend. Cun la firma Fortimo Invest AG da Son Gagl aveva la vischnaca chattà in'investura. La firma dals frars Philipp e Remo Bienz haja era in project da bajegiar a Murschetg in hotel nov ed è dependenta da persunal stagiunal che po abitar en la vischinanza.
Perquai che recurs retardian quai project d'hotel saja Fortimo sa retratga dal project a Pardanal, conferma il president communal. La suprastanza fiss stada pronta da fixar in contract per il dretg da bajegiar per la parcella 1575 cun la firma.
Trais partenaris - il president communal sco cumpossessur
Cun la retratga da l'investura è il squitsch creschì. La mancanza d'abitaziuns per persunal da gastronomia, pendicularas e mastergnants è urgenta. La plaunca en discussiun, tranter il stradun da l'Alpsu e la Val Mulin, è anc ussa vida. Ina part da la parcella, la surfatscha planiva giudim la plaunca sut la chaplutta s. Clau, dovra la vischnanca actualmain sco deponia da verdim e chagliom.
Damai ch'il verdim vegn manà davent periodicamain, vegn quest areal redimensiunà.
Il president communal raquinta ch'i haja dà enqual midada dapi la skizza da project avant prest trais onns. Entant è el sez daventà cumpossessur d'in hotel ed ustaria a Laax. El haja fatg quai pass per impedir che l'immobiglia giaja en mauns da speculants, e per mantegnair la tradiziun gastronomica dal Seehof, sco quai ch'el sincerescha.
Ensemen cun Ueli Grand e Moritz Müssig ha Franz Gschwend fundà la societad nova «Seehof Beteiligungs AG». Ussa vul questa societad bajegiar ina chasa da persunal, cunquai che las dumondas per abitaziuns da persunal n'èn betg tschessadas, anzi, il squitsch crescha ad in crescher.
Cun trais mastergnants
Il medem temp tschertgavan trais mastergnants indigens spazi en la zona Pardanal. Questas trais fatschentas han en il fratemp fundà la societad simpla Mulin Nova. Sin ils lavuratoris e magazins han els projectà duas auzadas cun mintgamai nov studios d'affittar.
Tar tuttas decisiuns en suprastanza che pertutgan questa tractanda sun jau natiralmain m'abstenì da la discussiun e da la votaziun.
Per la «Seehof Beteiligungs AG» e la societad simpla «Mulin Nova» dals trais mastergnants valian exact las medemas cundiziuns per il dretg da bajegiar sco per mintg'autra fatschenta che bajegia a Pardanal, sincerescha il president communal. Plinavant haja la suprastanza communala era laschà sclerir giuridicamain la chaussa, ed i saja definì ch'ils studios possian mo vegnir duvrads per alloschar persunal, per nagut auter.
In diever turistic è exclus.
La dumonda da bajegiar dal project Seehof Beteiligungs AG è stà publitgà dals 14 da mars enfin ils 3 d'avrigl. Quella da la societad Mulin Nova è publitgada enfin ils 23 d'avrigl 2025. Decisiuns en chaussa n'ha l'autoritad da bajegiar anc betg prendì enfin la fin da redacziun da quest artitgel (09-04-2025).