Durant l'enviern èn ellas il cor dal turissem grischun – las pendicularas, sutgeras e runals che transportan di per di millis da persunas enfin sisum ils culms. Durant la stad han quels indrizs da transport ina pli pitschna impurtanza, e mo singuls d'els èn en funcziun. Temp per ils responsabels da far las lavurs da mantegniment necessarias, per che tut saja puspè pront sin cura ch'i va liber curt avant Nadal.
Las revisiuns en las lavurs principalas da la stad
Responsabel per ils indrizs da transport da las pendicularas da Breil Vuorz Andiast è il manader tecnic Marcel Cavegn. Las revisiuns da tut quels indrizs dovran ina buna planisaziun e coordinaziun.
Las lavurs sajan gia planisadas sur 15 onns, di Marcel Cavegn. Il furnitur determinescha las periodas da revisiuns e controllas che ston vegnir fatgas. La suga da la sutgera per exempel vegn controllada igl enviern mintga mais visual e mintga trais onns vegn ella controllada cun ils responsabels dal chantun a moda magnet-inductiva. Lura vegn decidì sch'ella è anc buna, po vegnir reparada u sto forsa schizunt vegnir remplazzada.
Lavur en l'autezza
Ina da las lavurs che vegnan fatgas la stad è il mantegniment da las battarias. Las battarias èn las retschas da rodas che portan la suga sin mintga petga. Mintga roda vegn controllada, unschida e sche necessari remplazzada. Las lavurs sin las pitgas èn strentgas e basegnan grondas mesiras da segirezza. Uschia en ils collavuraturs adina colliadas cun in indriz da segirezza per ch'ina crudada en la profunditad n'è betg pussaivla.
Las sfidas creschan
La gronda part da las entradas fan las pendicularas durant l'enviern. La stad percunter na vegnan betg blers daners en la cassa. Tar las pendicularas da Breil fan las entradas da stad ora sulettamain 5%. Quai è ina sfida per ils responsabels. Quels emprovan da midar quai cun mesiras sco augmentar la purschida durant il temp «verd». Per quel intent planiseschan las pendicularas da construir ina gondla che maina da Breil direct enfin l’Alp Dado. Era cun il Ressort Pradas emprovan ils responsabels d'augmentar la purschida da stad
Ina autra sfida, uschia il directur Beat Zenklusen en l'intervista, saja da chattar avunda persunal qualifitgà. Durant l'entir onn lavuran il mument 18 persunas tar l'interpresa . L'enviern crescha quel dumber sin dapli che 100 persunas che lavuran en il territori da skis.
