Guido Friberg, il president dal comité d'organisaziun, ha annunzià en in'intervista cun RTR: «Nus avain gì insumma nagins resuns, quai avain nus dentant d'ina vart era spetgà» – ni da participants potenzials, ni da sponsurs u da la politica locala n'haja dà reacziuns, di Guido Friberg.
Nus essan s'occupads in lung temp cun quella situaziun. Igl è uss il mument da chalar.
Il motiv principal per la fin dal maraton saja il dumber da participantas e participants che sa reducescha cuntinuadamain e l'interess public che sminuescha. Guido Friberg ha accentuà ch’i haja danovamain dà in digren da participants, ed era l'interess dal public da visitar e guardar las cursas saja sa sminuì. Las finanzas sajan bunas, las cundiziuns a Sedrun era, ma la glieud manchia, declara Guido Friberg.
Nus avain vairamain gì ina bella collavuraziun en il comité d'organisaziun.
Era sche Guido Friberg deplorescha la fin dal Surselva Maraton, guarda el enavos sin blers bels muments dal passà.
Las occurrenzas per uffants restan probablamain
Ils proxims pass cumpiglian da communitgar la fin da l’occurrenza a Swiss Ski, il partenari per las cursas da Swiss Loppet. Plinavant vegnia la primavaira u la stad a dar in'occurrenza finala per las voluntarias ed ils voluntaris, sco era per sponsuras e sponsurs – quai sco engraziament per lur engaschi durant blers onns.
Schegea ch'il Surselva Maraton è mess sin glatsch, dettia pli probabel vinavant las occurrenzas per ils uffants, di Guido Friberg. Là sajan avunda persunas vinavant prontas d’organisar las cuppas nordicas ch’han lieu la sonda.