Il comité d'organisaziun dal Surselva Maraton ha communitgà en l'organ uffizial da la vischnanca da Tujetsch, la Tuatschina, ch'el na cuntinueschia betg pli. La raschun èn la participaziun magra e l'interess dal public che saja tschessà ils ultims onns. Plirs commembers veglian surdar las incumbensas en novs mauns. Gia l'onn passà haja il comité fatg ponderaziun co cuntinuar ed empruvà da motivar novas persunas, dentant senza success, quai ha Guido Friberg ditg envers la Fundaziun Medias Rumantschas.
Quella decisiun n'è betg stada simpla, mo ella è sa madirada il davos onn. I faschess propi mal sch’i na dess nagina successiun per il maraton.
Interessentas ed interessents pon s'annunziar
Tgi ch'ha interess da surpigliar il timun da la cursa da passlung ch'appartegna al Swiss Loppet, po s'annunziar enfin ils 6 d'avrigl. Sch'ins na chattia enfin lura nagina successiun, lura n'haja il Surselva Maraton nagina cuntinuaziun. Il schaner 2025 è il maraton stà per la 35avla giada. La medema fin d'emna han ils organisaturs era purschì cursas dals giuvenils en il rom dal BSV Nordic Cup e dal Cup nordic Energia alpina sco er concurrenzas dal Swiss Cup.
Emprim maraton il 1987
Las emprimas giadas ha il maraton manà da Surrein a Trun, envers Mustér cun arrivada a Sedrun sur 42 kilometers. Gia la fin dals onns otganta ed ils onns novanta n'han ins betg pudì organisar il Surselva Maraton regularmain sin quest traject pervia da mancanza da naiv. Il 1993 è la cursa lura stada l'emprima giada a Sedrun/Rueras pervia da pauca naiv. A la fin dals onns novanta han ils organisaturs lura decis da spustar il maraton cumplettamain en Val Tujetsch. Ils megliers onns èn 400 curridras e curriders stads a la partenza dal Surselva Maraton.