80 curridras e curriders èn stads al start dal 35avel Surselva Maraton da passlung a Sedrun. Jan Fässler dal Toggenburg ha purtà a chasa la victoria. Meglier Grischun è il defensur dal titel Toni Livers daventà. Il currider oriund da Trun è vegnì segund. Tar las dunnas ha triumfà Seraina Boner, la dunna da Toni Livers.
Dapli
Sin il podest
-
Bild 1 von 2. Il podest dals umens cun Toni Livers (2.), Jan Fässler (1.) ed Avelino Näpflin (3.). Bildquelle: FMR.
-
Bild 2 von 2. Il podest da las dunnas cun Lina Bundi (2.), Seraina Boner (1.) e Nina Cantieni (3.). Bildquelle: FMR.
L’aura avess bunamain mess pals en las rodas dals organisaturs. Questa notg hai pluvì pervia da las temperaturas autas e suenter navì. Uschia hajan ins anc ina giada stuì ir cun la maschina da pista per che la loipa vegnia glischna. Temperaturas stgars sut nulla han alura procura che la loipa saja stada bella da currer, di il manader da la cursa Toni Cathomen. Curt suenter l'emprim culp da partenza è lura era la tschajera svanida ed il sulegl ha splendurà a l’arrivada.
Surselva Maraton 2025
-
Bild 1 von 6. Emprims curriders a la partenza. Bildquelle: RTR.
-
Bild 2 von 6. Partenza da las dunnas. Bildquelle: RTR.
-
Bild 3 von 6. Passlungist tar la segunda runda gist sut la plazza da sport Dulezi. Bildquelle: RTR.
-
Bild 4 von 6. Curriders giu en la val. Bildquelle: RTR.
-
Bild 5 von 6. A l'arrivada: Il victur Jan Fässler ed l'emprim Grischun davostiers, Toni Livers. Bildquelle: RTR.
-
Bild 6 von 6. Curriders da la regiun ch'èn adina puspè a la partenza dal maraton: Remigi Maissen e Simon Orlik. Bildquelle: RTR.
Paucs curriders, avegnir intschert
Ils organisaturs dal Maraton Surselva han gia l’onn passà gì mo var 170 curridras e curriders. Quest onn èsi sta cun radund 80 passlunghists anc pli pauca glieud. Sur l'entira fin d'emna, cun tut las occurrenzas, èn dentant var 200 curridras e curriders stads a la partenza.
Guido Friberg – il president dal comité d’organisaziun – tira ina bilantscha positiva. Guardà sin l’entira fin d’emna – munta cun las occurrenza da Swiss Cup ed Raiffeisen Nordic Cup – hajan ins gì avunda glieud. Resguardond mo il maraton, dettia dentant memia paucas curridras e curriders. I saja adina pli grev da motivar ils amaturs, era quels da la regiun. Sch'i vegnia a dar vinavant il Surselva Maraton na saja anc betg segir. Co ch'i giaja vinavant vegnian ils organisaturs anc a decider.