En il sectur dals servetschs da l'ospital haja il Center da Sanadad Savognin SA lavurà fitg bain, è da leger en il rapport annual dal 2022. Cun 425 cas staziunars hajan perfin surpassà la finamira da 400 cas. Quai saja d’attribuir al fatg che betg mo l’enviern, mabain er il rest da l’onn saja stà ferm. La directura Christine Demarmels argumentescha ch’il Center da Sanadad haja in bun team da medis qualifitgads che vegnia stimà dad indigens e giasts.
Cuntent saja ella era cun ils affars da la chasa da vegls ed attempads, ed era las abitaziuns cun servetsch sajan adina stadas occupadas bain malgrà ch’igl haja dà dus fin trais midadas d’avdants. Ch’il quint annual serra cun in pitschen minus haja da far cun il fatg, ch’ins haja pervi da midadas organisatoricas ordinadas dal chantun tar il salvament d’urgenza Grischun Central gì gusts da 336'459 francs. Per congualar: Il 2021 aveva il servetsch da salvament anc custà mo 50'000 francs. Sin dumonda dad RTR ha la directura dal Center da Sanadad Christine Demarmels ditg, ch'els stoppian far giu quint auter cun il persunal d'urgenza. Da nov haja il persunal da las ambulanzas betg pli servetsch da pichet, era las lavurs da preschientscha stoppian vegnir pajadas. Perquai sajan ils custs per il servetsch d’urgenza s’augmentads talmain.
