La dumengia ha a Mustér gì lieu il tschintgavel «Oldtimer Treff Surselva», nua ch'ins ha pudì admirar var 100 differents oldtimers e youngtimers dal Grischun, la Svizra – ma er dad ordvart ils cunfins.
E gia la sonda èn 20 dad els vegnids ensemen per l'uschenumnà «Prolog». Quai è la tura ch'ha lieu il di avant l'entupada dad oldtimers. Quest onn ha il viadi manà da Trun – Pass dal Lucmagn – Biasca – Tremola – Pass dal Son Gottard – Andermatt – Alpsu – Trun.
Bunamain 200 kilometers – tut sin vias lateralas. Uschia che quella tura ha – cun giudair e far differentas pausas – cuzzà passa nov uras.
Ils 32 fans dad old- e youngtimers, ch'èn sa participads a questa tura, han fatg quai betg mo per giudair la charrada mabain era per admirar ils auters autos, esser da cuminanza e partir lur passiun. Ed uschia è stà cler, che l'apero la saira ha era gì lieu ordadora en il giardin – circumdà da lur bischus.
