Fascinaziun autos - Amur per oldtimers

In studi quinta ch'i dat en Svizra circa 180'000 oldtimers cun ina valur totala da 7,7 milliardas francs. Radund 250 clubs ed uniuns s'engaschan per il mantegniment e «vivan» il plaschair per quests autos, ch'èn tuts pli vegls che 30 onns.

Il garaschist da Sedrun Helmut Widera è in d'els. Il plaschair per quels autos saja mess ad el en tgina ed uschia è il Ford Mustang che ses bab aveva cumprà, sia emprima colliaziun cun autos d'in auter temp. Il mument saja quel auto pront per puspè charrar sin via. Quai saja dal reminent il lieu nua ch'in auto tutga. Ses auto da siemi saja in Jaguar E-Type da l'emprima seria. Quai saja simplamain in auto da pura bellezza.

Amaturs d'oldtimers er en Surselva

Manuel Reichenbach, l'ustier cun 16 puncts da Gault Millau a Trun è pervia dal Volvo 123 GT da ses bab gia baud stà fascinà da quels autos. Sias regurdientschas d'uffanza èn colliadas cun quel auto. El haja adina detg a ses bab ch'el na dastgia betg vender quest auto ed uschia è l'auto svedais anc adina en ses possess.

Per il gastronom èsi cler: «persunas cun in oldtimer giaudan la vita, ed uschia er ina buna tschavera». Ch'ins vegn en «discurs da benzin» vi da maisa saja adina il cas. La scena d'amaturs d'oldtimers saja en mintga cas er in factur turistic e la Surselva, cun la regiun dal Gottard, in lieu ideal per viver la fascinaziun e cumbinaziun oldtimer e culinarica. Ses auto da siemi è in Citroen DS, l'auto ch'ha revoluziunà la construcziun automobila en l'Europa.

Quatter Ferraris en garascha

Theres Projer, l'architecta da Filisur, è gia adina stada fascinada d'autos. Ch'ella ha Ferraris en garascha è plitost casualitad. L'emprim saja numnadamain stà in barat cun in Alfa Romeo ch'in garaschist da Cuira vuleva per tut pretsch. Ina giada saja quel vegnì cun il Ferrari avant chasa, ella haja fatg in gir ed il rest è istorgia.

Per la dunna da passa 70 onns èn quels autos er architectura. Uschia passenta ella uras en la garascha contemplond las lingias da ses autos. En quels muments chattia ella forza ed inspiraziun per la lavur, schizunt il medi haja ditg ad ella d'ir en garascha e sa laschar purtar bunas emoziuns cura ch'i na giaja betg bain ad ella.

Per in da ses anniversari radunds haja ella cumprà sco regal per sa sezza in Ferrari. In mellen, atgnamain la colur originala da la firma d'automobils taliana. Ussa spetgia in proxim regal. Ina malsogna sajan ils autos forsa bain, di Theres Projer, ma ina che fetschia bain.

Impressiuns

Or da l'archiv:

Ina fascinaziun cun lunga tradiziun