Cun las emprimas fins d’emna chaudas e sitgas da primavaira sa dasdan els puspè en garaschas e remisas. Els sgolan ora per turas, sentupadas ed exposiziuns – ils oldtimers da tuttas sorts. Sin duas ni quatter rodas, cun alas, tant anteriurs vehichels da strapatsch sco aristocrats dapi lur naschientscha, respectiv construcziun. Sco veterans giaudan els passiun e premura eguala da lur possessurs. Els profiteschan dal trend «retro» che influenzescha schizunt furma ed interiur dad autos contemporans (exempels VW Beetle, Fiat 500 ed auters). Dentant nagut vala - sa chapescha – sco l’original.
Anc ina classa pli auta: l'aviaziun
En ils maletgs e tuns che noss archiv porscha n’èsi dentant betg las carossas americanas ed ils bolids a far la gronda parada. La passiun per mecanica veglia e design d’epoca reflectescha er il caracter pli mudest, muntagnard ed rural da nossa cuntrada.