L’idea na saja betg nova e vegnia gia pratitgada en pliras autras vischnancas. Surtut plattafurmas digitalas sco il «Digitaler Dorfplatz» han pliras vischnancas grischunas gia instradà dapi in temp. La differenza qua è che la populaziun po exprimer sia opiniun davart projects concrets cun cifras e fatgs, di Martin Cavegn. Quai muntia era gronda lavur preparatorica. L’administraziun stoppia per exempel elavurar in messadi per pudair prender la decisiun. Tuttina vegnia uschia evità lavur dubla, declera Martin Cavegn. In project che na survegn insumma nagin sustegn, na vegnia numnadamain era betg elavurà en detagl.
L’idea centrala è da eruir l’opiniun tar projects concrets per evitar da far lavur per l’olma dal Stoffel.
Decisiun n’è betg lianta
La decisiun finala ha adina la radunanza da vischnanca. Uschia èsi pussaivel ch’in project ch’ha grond resun, na vegn la finala betg approvà sin vischnanca, perquai che betg las medemas persunas èn preschentas. Surtut la giuventetgna manchia savens a las radunanzas da vischnanca. Ina finamira dal nov sistem da votar online saja era da motivar persunas interessadas da vegnir a votar la saira da la radunanza da vischnanca, accentuescha Martin Cavegn. Il temp vegnia lura a mussar tge resun che talas votaziuns consultativas han.
-
Bild 1 von 1. Sin la pagina d’internet da la vischnanca chattan ins tut ils projects cun fotos, cifras e la pussaivladad da votar consultativ. Bildquelle: Vischnanca Tujetsch.
Per il mument hajan ins sapientivamain avert las votaziuns davart ils sis projects per tuts. Trais da quels stattan en connex cun la meglieraziun da la purschida al Lag da Claus, dus tractan la plazza da gieus ed il spazi dasper la halla Dulezi ed ina project è ina nova punt da peduns. Quai sajan tut projects per meglierar la purschida per la populaziun – precis qua saja impurtant da sentir il puls dals abitants e las abitantas. A partir dals 21 da favrer fin la fin avrigl pon ins decider. I fetschia senn da limitar il temp. Savens sa participeschian ils interessads a l’entschatta d’ina tala acziun. Perquai hajan els tramess a tuttas chasadas in flyer cun las infurmaziuns. Els fetschian tenor pussaivladad era reclama sur las medias socialas.
Ideas per il temp liber
Ils sis projects che la vischnanca presenta sin la pagina d’internet pertutgan purschidas dal temp liber:
- ina nova punt da colliaziun per peduns a Sedrun/Gionda
- ina engrondiment da la plazza da gieus a Drun e nov lieu da sentupada
- in diever pussaivel da la surfatscha sper la halla Dulezi
- in parc da velos dasper il Lag da Claus
- ina zipline (suga da pendular) era en il conturn dal Lag da Claus
- in parc da raiver per uffants dasper Lag da Claus
Mintga project è descrits sin la pagina d’internet. Latiers vegnan fotografias, plans e visualisaziuns sco era las cifras e calculaziuns necessarias. Il grond da quels sis projects è l’engrondiment da la plazza da gieus a Drun sut il Bogn Sedrun. Lez è calculà cun custs d’enturn in mez milliun francs.
Sco proxim suonda la revisiun da la planisaziun locala
In dals projects che vegn preschentà proximamain a moda sumeglianta è la revisiun da la planisaziun locala. Online possian ins alura dar giu il consentiment per mintga parcella. Quai haja surtut da far cun la cumplexitad da questa revisiun, declera Martin Cavegn. Ina part da la consultaziun legala veglian els perquai far a moda digitala. Dasper dettia tut ils plans fisicamain sin vischnanca. Quai fetschia senn perquai che la vischnanca da Tujetsch ha passa 1'200 abitaziuns da vacanzas. L’interess per la revisiun da la planisaziun locala saja fitg grond, accentuescha il president communal da Tujetsch.