Il comité da l’iniziativa dal pievel «Per ina limitaziun dals fieus artifizials» ha inoltrà oz passa 137'000 suttascripziuns a la Chanzlia federala. Per ch’i dettia ina votaziun en chaussa, èn necessarias 100'000 suttascripziuns valaivlas.
L’iniziativa pretenda che tant la vendita sco er il diever da fieus artifizials vegnian limitads. Uschia duajan umans, animals ed ambient vegnir protegids da la canera ch’ils fieus artifizials chaschunian, scriva il comité. Excepziuns duajan esser pussiblas cun ina lubientscha chantunala per occurrenzas da muntada surregiunala.
Davos l'iniziativa stattan pliras uniuns d'ambient e da protecziun d'animals, uschia per exempel «Vier Pfoten», Fondation Franz Weber, Greenpeace ubain l'uniun Protecziun svizra dals animals.
Co vai vinavant?
Sco proxim controllescha la Chanzlia federala la suttascripziuns da l'iniziativa. Sche dapli che 100'000 suttascripziuns èn valaivlas, va l'iniziativa lura tar il Cussegl federal. Quel ha lura temp 12 mais per elavurar ina missiva. Fin che l'iniziativa va a l'urna vegni anc a durar intgins onns.
Ord l'archiv
En Grischun datti numerusas vischnancas ch'enconuschan già in scumond da fieus artifizials. Ina da quellas è Laax. Per la Festa naziunala dal 2018 avevan els perquai planisà insatge spezial.
