Muot da Munt sur Trun - In crappun da 600 tonnas è stà en moviment

Il territori sur Trun e la Val Punteglias è per part fitg taiss. Adina puspè è crappa en moviment là. In exemplar extraordinari è sa muventà quest atun en il territori da Muot da Munt. Sco il selvicultur communal da Trun, Carlo Monn, ha ditg sin dumanda da la FMR, è il crap sa distatgà en la plaunca e sa ruschnà radund 70 meters dal terren spundiv giu. El è lura sa fermà per ina buna part sur il guaud.

Avant che sa ruschnar sa chattava il crap a l'ur da las paralavinas en il territori da Muot da Munt sin in’autezza da radund 2'350 meters sur mar. «In mir ch’era vegnì construì là sco part da las paralavinas cunfinava cun il crap. Perquai n'era quai crap betg in nunenconuschent. Tuttina na quintava nagin ch’el pudess vegnir en moviment in mument», declera Carlo Monn. Succedì è quai probabel l'october:

Il crap ha ina dimensiun da 250 meters cubics ed ina paisa da radund 600 tonnas. Sin ses viadi a val ha el destruì tschintg elements da paralavinas, 20 ulteriurs elements èn per part era vegnì donnegà d’autra crappa ch’è vegnida en moviment il medem mument. Il selvicultur communal quinta ch’il donn caschunà importia tranter 300'000 e 500'000 francs. Schebain las lavineras vegnan reparadas u eventualmain remplazzadas cun raits da crappa è anc da decider: «Raits cunter crappa pon era servir sco lavineras.» Igl è prevesì da refar il donn la stad che vegn.

«L’emna passada ha in geolog prendì invista da la situaziun ed era registrà quella cun fotografias da drona. Enfin la fin da quest’emna giuditgescha el la situaziun. Lura savain nus dapli», di Carlo Monn. Gist tenor parairi resta il crap là sco el è u ch’el sto vegnir siglientà. Il giudicat vegn er a concluder, sche gliez fiss necessari anc quest atun u pir la primavaira. «In privel per il vitg e la populaziun n'exista betg e la senda che maina 200 fin 300 meters pli a bass è serrada per il mument. Da quai temp è la senda tuttina pauc frequentada», di Carlo Monn. Medemamain n'exista era betg in pli grond privel da lavinas l'enviern. Ils paralavinas fetschian er uschia lur servetsch, stoppian dentant vegnir reparads.

La raschun, daco ch'il crappun è sa distatgà tuttenina n'è betg dal tut clera. Tuttina fa il selvicultur communal menziun da la midada dal clima cun pli autas temperaturas e consequentamain cun terren che lavura pli fitg, surtut da temps cun bleras precipitaziuns. Il lieu nua ch’il crap è sa ruschnà è ina gonda spundiva.