Urban Maissen è il manader da l'Uffizi da guaud e privels da la natira dal Grischun. Ses uffizi ha da survegliar, e surtut d'analisar e definir lieus da privel. Ed uschia è l'uffizi responsabel per cataloghisar las differentas zonas. La cumissiun da privel è il gremi da specialists che ha da far questa lavur.
En il Grischun è mintga tschintgavla persuna confruntada cun in privel da la natira – il pli savens èn quai bovas e lavinas, il main savens auas grondas. Mintg'onn vegnan en media registrads radund 200 eveniments da privel.
La midada dal clima
I sajan savens ils eveniments extrems sco bovas, lavinas u auas grondas cun gronds donns, che chaschunian ina midada dal pensar. Quai di il professer per climatologia a l'Universitad da Berna, Stefan Brönimann. Quels eveniments capitan deplorablamain er adina puspè.
En in chantun sco il Grischun saja la populaziun cunscienta mintga di dal privel, di Urban Maissen. Losch è el dal fatg ch'il Grischun ha gia avant passa 50 onns cumenzà cun cataloghisar las zonas da privel.
